警察做嘢時俾人拍片都好常見，不過好多警察都唔鍾意俾人咁樣監察，噚日有警察叔叔為咗唔畀班o靚仔拍片掟上網，不惜訛稱警察有肖像權，勢估唔到香港警察竟然博大霧，呃細路。呢宗警察街頭騙案受害人係社運少年Donald仔，事發地點係《城市論壇》後嘅維園。
當時班維園少年同維園阿伯爭論，軍裝警上前了解，要求Donald仔出示身份證，警察叔叔話查證係警察權力，係政府出糧畀佢做呢樣嘢。現場有人拎手機拍片，點知有警察惡到警告佢哋段片只可以「自用」，唔能夠擺上YouTube或fb。有o靚仔問點解，阿Sir竟然話涉及肖像權。查實香港冇肖像權法例，有的只是警察濫權！