退休多年嘅楊鐵樑近年生活從簡，閒時出書教英文，做善事回饋社會，不知幾悠閒。猶記得當年佢同董建華、吳光正爭做第一屆特首，一轉眼已經14個年頭，但呢段經歷對楊官嚟講恍如昨天，佢噚日一聽見「參選」兩個字，即刻話血壓高，走夾唔唞。
話咁快出年又選特首，除咗唐英年同梁振英，范徐麗泰最近又開腔話兩個月後考慮係咪參選，八方諗住問吓楊官點睇，唔問猶自可，佢聽見當堂嚇一跳，原本坐喺度嘅佢，成個人都向後仰一仰，「我參選？一講參選我血壓又高啦！」估唔到楊官識講爛gag，仲曉扮聽錯；八方問佢對國民教育嘅睇法，佢又指住隻手耍太極：「嘩，又血壓高啦！」
楊官雖然出入要用枴杖，但做起善事嚟就特別精神，幫數十名粉絲簽名絕冇手軟，仲要通場走，在旁嘅媳婦跟都跟唔切。八方講起佢喺港台嘅節目《楊鐵樑留言信箱》，楊官好認真咁問八方意見：「其實你覺得好唔好（聽）呢？」