一年一度紀念釋迦牟尼誕生嘅佛誕係佛教盛事，寶蓮寺噚日搞咗個浴佛慶典，身為主人家嘅禪寺住持釋智慧法師近年身體唔多好，已經好少公開露面，噚日大和尚現身招呼賓客。早排提過有意退休嘅佢，宣佈計劃有變，退休無期。
寶蓮寺近年大興土木，寺外廣場嘅工程已搞掂，但興建萬佛殿呢個重點工程就出咗啲問題，要等多兩年先至完工，董事局已經叫咗法師唔好再提退休，做好萬佛殿個project再算。住持繼任人選方面，法師話係由董事局決定。
法師冇得諗退休，都要照顧健康，佢同八方講08年中風入院後休養，家表面上好番好多，但係腦筋就冇以前咁靈活，搞到講說話都冇以前咁好，唔怪得法師連致歡迎辭都要搵人代勞啦。