五月份有三個大節日，五月一日勞動節，五月八日母親節，五月十日佛誕，加埋四月下旬之復活節，接連放假，打工仔無不爽神，有長周末確係開心嘅。如果早有計劃，預先訂好機票去外地一行，就更加爽，不過今年因為日本出現特殊災難，不少老友嘅預先籌謀變成畫餅，紛紛取消去日本過長周末嘅計劃，唔怪得國泰新CEO史樂山話日本航線生意大跌，其他航線生意雖好，仍然補唔番。
國泰莊偉茵來電郵邀請到馬會廂房睇跑馬，唔通與國泰有關？睇真啲，唔係噃，原來呢勻莊大姐帶過第二頂帽，就係「香港傷健策騎協會」（RDA）嘅籌款委員會主席。RDA於五月十日星期二佛誕賽馬日，贊助一場盃賽，故此廣邀各界人士到賽馬會廂房一齊參加賽馬。左丁山當然要出席啦，一來莊大姐做義工，為RDA籌款幫助傷殘人士學習騎馬，今年幫手搞RDACup，用了不少心力，值得尊敬，二來左丁山也曾為RDA做過籌款義工茄喱啡，跟馬主N搖旗吶喊，今年有莊大姐接棒，深慶得人，佢邀請到，點會唔去呀。
明日之香港傷健策騎協會盃由第三班馬跑一千米，十四隻短途專家包括喜盈門、清新空氣、勁闖駒、鷹之團、正白旗等將有一番劇鬥，戰況可觀，睇吓邊位馬主可從主禮嘉賓、民政事務總署署長陳甘美華手上接過獎盃。RDA自一九七五年由麥理浩夫人創立以來，傷健人士不斷受到鼓勵，騎上馬背作心理與肢體治療，重拾活動信心，現時每星期有一百七十人在薄扶林及屯門公眾騎術學校參加傷健策騎課程。一位JohnAnthonyDavies為國際RDA寫了一首詩，名ISawAChild：節錄一段：Isawachild/nolegsbelow/sitonahorse/andmakeitgo/throughwoodsofgreenandplaceshehadneverbeen/tositandstare/exceptfromachair，十分令人感動。香港RDA每年向企業及個人籌款以支付營運費用，有意支持者，請打電話24549961，傳真24655914，電郵[email protected]。