親情無價，子女們都在母親節花費買禮物媽咪，其實也不及母子咇溫馨小敍，今日母親節，媽咪才是主角，最好莫過於一家人齊享天倫之樂。圈中星媽許秋怡和潮模靚媽歐陽妙芝最享受攜子戶外活動，看到兒子天真爛漫笑靨，健康成長，這才是世間的無價寶。已有經濟能力的港男冠軍翟威廉有空陪媽咪之餘，還希望多給家用，回饋養育之恩。 撰文：比華利
許秋怡囝囝揼骨服侍
王書麒日前與獨子Cody夾計老婆許秋怡，以家庭樂為名到迪士尼樂園玩樂，實質兩父子安排了三響炮驚喜給秋怡提早慶祝母親節，有花、有禮物又有蛋糕，令她感動得眼濕濕。
怕醜仔Cody拒開金口做訪問，但就用實際行動向媽咪示愛，他不停與媽咪咀嘴兼搥背，場面溫馨。秋怡表示母親節感觸良多，勾起她想念離世7年的亡母，秋怡說：「我仲好掛住媽咪，我會隨身帶住媽咪嘅相，過時過節仲會拎出嚟傾吓偈。」
慨嘆兩老早逝
秋怡慨嘆奶奶和母親都早逝，令囝囝Cody少了兩老痛錫，她說：「Cody生喺呢個年代係好幸福，但佢有一樣嘢唔夠人哋，咪係嫲嫲同婆婆都早死，屋企有個老人家真係如有一寶，就算外傭幾好都唔係自己人，佢哋只係嚟打工，點會咁貼心貼身對我個仔，Cody就係少咗呢份福氣。」
為了讓Cody健康成長，秋怡事無大小必親力親為照顧，就算出埠登台回家疲累不堪，她也不假手於人，她說：「我飛完返嚟，幾攰都幫個仔冲凉陪佢瞓，同佢溫習，見到個仔就乜攰都冇晒。」現年7歲的Cody讀小二，距離成家立室有大段日子，但秋怡已為囝囝做了周詳安排，她說：「我同書麒商量好晒，到時唔好煩個仔，一個男仔，又要照顧父母，仲有岳父岳母咪話唔吃力，我哋將來老咗，入住老人院得o架喇，病咗定時定候有姑娘餵藥，三餐無憂，仲有院友陪唔會悶。」
新抱要識煮飯
父母養兒長憂九十九，秋怡已為挑媳婦費煞思量，她說：「Cody揀老婆就要揀個識煮飯煲湯，咁我哋就唔擔心喇，老婆唔識煮就要教定Cody煮。」身邊的Cody聽到父母將來不與他同住，立即扁扁嘴，Cody指將來志願想做醫生，他說：「希望爹哋媽咪病時，我可以照顧佢哋。」Cody渴望有弟妹相陪，40歲的秋怡對此說：「我都有諗想追多個，但怕將來Cody同細佬或妹妹差7年有代溝，又怕自己老無力照顧，我知想生真係要快啲決定。」
場地：香港迪士尼樂園
歐陽妙芝等心肝椗起屋
兩子之母的潮模歐陽妙芝，其長子方玉丞（Achille）6歲，幼子方玉亨（Atilla）也3歲半。今日母親節正是Achille的農曆生日，雙重意義。
妙芝日前一拖二到石澳沙灘嬉戲，兩子赤膊玩水，Achille大膽撲浪，Atilla則怕水嗲媽咪抱抱。小男兒Atilla的手指和腳趾貪靚塗了鮮艷甲油，妙芝說：「佢見我髹，佢又要試吓，我覺得呢啲無傷大雅咪畀佢玩吓，佢呢啲年紀鍾意模仿，大啲就唔鍾意，冇所謂。」
賺錢任媽咪使
Achille和Atilla為表孝心，兩兄弟日前已送上親自繪畫的母親節賀卡，當中少不了紅心圖案和愛的字句，令妙芝甜在心頭，當日他們又唱歌冧母，令她笑不攏嘴。
Achille童言無忌承諾：「我大個賺到錢要畀媽咪任使，使到佢冇晒為止，又起間5000幾萬間房嘅大屋佢住，起個沙池畀佢，因為我鍾意玩。」妙芝聽後即笑說：「咁老公要勤力啲搵錢。」
教做人要大方
Achille大讚媽咪有求必應，他說：「我想去邊，買乜，媽咪都一定做到。」妙芝直認不諱：「我真係好似佢哋個神，只要能力範圍做到，會滿足佢哋，但我對佢哋品德要求都好嚴格，我成日教佢哋記住『己所不欲，勿施於人』，佢哋姓方，哥哥係『大方』，細佬係『細方』，做人要大方啲，尤其男仔唔可以孤寒小家。」
妙芝雖讓兒子自由發展，但當他們頑皮也要受罰，賞罰分明下兩子非常有家教。
化妝：PinkyofPortfolio
髮型：Winkyofii
翟威廉樂做提款機
港男冠軍翟威廉跟母親長得餅印一樣，不用開工，兩母子便孖咇出動，他們日前往吃西餐提早慶祝母親節，翟威廉更送上珍珠頸鏈做禮物，還親自為媽咪戴上，得威媽眉開眼笑。
支持選港男
翟威廉表示自幼母親給他很大自由度，他說：「我中學之後，好想去日本留學，媽咪就幫我安排，舊年我想參選港男，媽咪又全力支持，所以冇佢我就冇今日。細個媽咪係我嘅提款機，家大個仔，我好想做番媽咪嘅私人提款機，畀張冇限額嘅提款卡佢，任攞唔嬲。」
對於兒子賣口乖，威媽聽後甜笑不停，問她下一步可渴望飲新抱茶，威媽即耍手擰頭謂不心急，希望兒子以事業為重，她說：「家無綫畀咁多機會佢，我都想威廉好好把握，男仔要事業為重。」