佘詩曼前晚喺銅鑼灣崇光百貨附近拍攝葉念琛嘅新片《人約離婚後》，不過，阿佘今次對手就唔係大隻仔羅仲謙，而係換咗方力申。片中飾演一對離婚夫婦嘅小方同阿佘，前晚喺鬧市拍攝嗌交戲，未埋位之前阿佘同小方猛喺度嘻哈大笑，但導演一roll機，阿佘即刻上晒身好投入演出，真係唔到你唔服。
莊思敏趁熱鬧
現場見阿佘同小方鬧交鬧到面紅耳熱，阿佘仲一度用手袋打小方，嗰下肉緊真係七情上面。不過，由於阿佘同小方表現太過落力，鬧到口乾，所以佢兩個一拍完即刻要飲水滋潤喉嚨。前晚佢哋喺鬧市開工，有近半百市民圍觀，唔少人仲攞手機同相機狂影，莊思敏咁啱路過，都專登停低同葉念琛打個招呼。
之後阿佘同o靚模蔡穎恩（Evelyn）喺夜晚11點幾移師去灣仔陳東里開工，期間有個醉酒佬同朋友路過，唔覺意撞跌咗攝製隊一盞佈景燈，工作人員以為整爛咗就報警求助。不過，警方到場之後發現盞燈冇損毀，電影公司方面亦都唔追究，所以警方口頭警告醉酒佬之後就畀佢離開。
