許志安與鄭秀文（Sammi）自從今年3月被本報獨家拍到於太平館撐枱腳復合後，兩人愛得越來越癡纏，由於Sammi目前與古天樂合作拍攝電影《高海拔之戀II》，有指安仔怕古仔與Sammi再撻着故急於催婚。面對情敵，安仔昨日以豪語回應說：「怕曱甴多過怕人！」
許志安昨日於銅鑼灣接受無綫生活台節目《Paco的風花歲月》訪問，安仔直言不擔心被主持人黃柏高（Paco）問到感情事，他說：「睇佢問唔問囉，佢唔問我就唔講。」他表示特意送上一支名貴筆給Paco，好讓他經常簽支票。
買樓住近Sammi
至於會否與Sammi結婚時借回該筆簽婚書，安仔說：「呢樣嘢冇得催，亦都從來冇諗！」Paco取笑安仔說：「擺酒囉！」有消息指安仔急於結婚，是怕了情敵古天樂翻撻Sammi，安仔說：「呢啲嘢冇得驚，我怕曱甴多過怕人囉，總之大家放鬆啲啦！」
有指安仔為靠近Sammi，故意選擇在港島區置業，他說：「係有買樓，都係為咗保值儲錢，家都諗住用嚟自住。」對於被指Sammi教他投資，安仔即豪氣說：「我買樓時佢都未出道，仲話教我！」
承認已見家長
安仔坦承早前與Sammi家人吃飯，但絕非傾婚事，只屬普通飯局，更揚言兩人未有心急結婚。對於Sammi年紀漸長會否逼婚？他即維護女友說：「我都好大o架喇，總之自然啲好啲，而且兩邊屋企人都冇催。」
採訪、攝影：王崇穎
