《青蜂俠》大戰雙頭槍　低頻好力

早兩日睇完《雷神奇俠》，主角拎住大鐵鎚扑扑扑，搞到地動山搖，選美國漫畫最強人物，我實揀佢！之但係同樣喺美國Hit起嘅《青蜂俠》，力量就平凡得多，賣點不在於神力有幾勁，呢隻Blu-ray採用DTS-HDMA5.1，環迴聲效不及7.1，但低頻力水夠，尤其大戰雙頭槍黑幫大佬，同埋連串爆炸場面，睇頭十足！

記者：陳國輝

房車激改　勁過坦克

對香港觀眾嚟講，可能會多一個情意結，事關周董亦有份參與，而且係以前李小龍也飾演過嘅青蜂俠助手加藤！佢好唔好戲？大家買返去睇就知，但講到玩靚聲，無咗周董就一定唔得！戲內經常出現由加藤改裝嘅房車，亦即係青蜂車，佢除咗車頭有一對類似軍用直升機嘅槍械，打開車門，仲有兩把機關槍會自動伸出嚟，再加上超硬淨車身、可穿牆過壁，無論槍戰聲、爆破場面，用嚟測試低頻一流！

■周董唔止唱歌叻，仲係武器高手！

■周董一打三，簡直型爆！

睇周董慢鏡混戰

畫質只可用不過不失形容，好多時當兩位主角穿上黑衫、黑褲、黑手套，再加埋黑色眼罩出場嗰陣，層次唔算分明，若然用緊較參差嘅高清電視，直頭要拉埋窗簾，否則全畫面只得黑色一片！值得一提係，特別嘅拍攝手法或可彌補畫面不足，例如當青蜂俠與加藤出場殺敵嗰陣，會出現超慢動作鏡頭，然而主角則以正常速度擊敗對手，感覺幾新鮮。