無綫舉辦嘅《魔法擂台》早前因參賽者李浩鋒喺YouTube上載咗一條聲稱被評判辱罵嘅片段而引起網民迴響，連帶兩名評判香港魔術家協會會長譚永銓（Albert）同台灣魔術家協會副會長程廣生（Erick）都被網民大起底，個樣似足洪金寶嘅Albert就被網民翻舊賬，話佢有口批評人技術差，但自己表演魔術時卻連番失手，有網民仲將佢09年失手嘅事上載YouTube，即時吸引逾30萬網民鬧爆「魔法洪金寶」。
片段入面Albert喺嘉賓熊黛林（Lynn）前示範凌空控制放有花瓶嘅枱，當Albert想抆走張枱布時，竟然搞到整張枱跌落地爛咗，嚇到身旁嘅Lynn目瞪口呆，爆嘅Albert只好面懵懵拎張爛枱返後台，啲網民仲揶揄佢想教後輩乜嘢叫失敗喎。
回應失手喊晒口
而被網民狂轟嘅Albert噚晚如常返將軍澳電視城錄影《魔法擂台》，佢死撐話：「嗰段片係幾年前，咁大衛高柏飛有冇失過手，任何人都會，自己近年都試過失手。」佢訪問期間因為憶起師傅仲忽然喊起上嚟，估唔到佢堂堂大男人原來咁脆弱。
至於Erick亦唔多討網民歡心，話佢唔接受其他評判嘅意見，佢試過唔like其他評判質疑佢嘅言論，竟然攞手上嘅簿打對方。