【本報訊】「原來真係慳咁多！」協助本報記者做今次測試的天水圍居民Connie大呻，交通費「貴得滯」，令她平日只能在區內活動，甚少「出城」到港島或九龍區。Connie以蠱惑招搭港鐵，花7.6元出中環後大嘆平好多，但因這招實屬違例，她表示就算慳得更多也不會以身試法。
Connie透露，平日要出入港九地區都寧可多花時間，選擇車費較平、車程較長的巴士，「（交通費）直情貴，出九龍香港都好貴，冇必要都好少出去，如果要出都坐巴士，雖然時間耐，但平少少都好，一係就坐朋友順風車」。她說，同區友人到港九工作都提早起身逼巴士不搭港鐵。
元朗區議員鄺俊宇指出，港鐵加價令新界西居民百上加斤，到巿區上班的人每月車資要近千元，車費貴令到居民利用港鐵漏洞想出千奇百怪的慳車費方法，包括「二人同行」。他說這方法在區內流傳一段時間，有居民更會在討論區相約同區的人「結伴」上下班。
另一名區議員周永勤指出，居民冒險逃票全因車費太貴，來回市區車費最少30多元，對於基層巿民是重負擔，他希望港鐵減價或推出較優惠的月票。而針對「二人同行」慳錢法，周永勤認為港鐵可延長原站出入所需時間，或在出入閘口安裝閉路電視監察。