令男人High爆嘅電影《狂野時速》又登場，一般飛車炒車已經滿足唔到《狂》迷，卒之今集狂加槍戰同肉搏，兼玩埋細車炒起大巴、拖住十幾噸夾萬鬧市逃亡等瘋狂場面。港車手睇完首映後大呼過癮，大讚特技令不可能變成可能！
記者：徐影龍
攝影：陳陶鈞
飛車佈局有心思
由第一集鬥1/4哩直線加速，到踩落東京挑戰o架仔飄移，《狂野時速》再拍落去一定要搞搞新意思。嚟到第五集，導演加重槍戰、逃亡同隻揪場面，飛車環節反而貴精不貴多，幾幕高潮佈局的確令人印象深刻，連鬥開GT房車賽同飄移嘅香港著名車手JamesTang，都睇到眉飛色舞，不過就話現實中無可能發生！
MissionImpossible
1.厚重夾萬鬧市亂Fing
光頭佬雲迪素糾集昔日戰友做世界，目標就係裝住一億美金嘅夾萬。雖然堅厚夾萬重逾十多噸，不過兩架DodgeCharger戰車拖住佢喺鬧市甩尾之餘，仲可Fing嚟Fing去，當武器攻擊敵人！James話就算拖得郁，都會因入彎時被夾萬「扯住後腿」而導致兩車相撞。
2.四両撥千斤
劫囚車一幕，女主角美亞先令大巴急速扭軚失重心，男主角拜仁再乘勢喺側邊鏟入，造成跳台效果，令成架大巴凌空彈起，直情將太極融入飛車特技，高呼過癮！James話：「無可能炒得起，架大巴咁樣壓埋去，只會令男主角夾到變柿餅！」
飽覽名車考眼力
正所謂聽古唔好駁古，《狂野時速》已奪下北美及多個地區開畫冠軍，氣勢如虹，另一成功因素係事先張揚戲內有大量名車登場，比過往四集有更多靚車，其中佳士拿旗下嘅Dodge，更係重點出擊，雲迪素揸勻新舊Charger，連警車都用埋2011Police版Charger，仲有FordGT40仿製版、雪佛蘭CorvetteGrandSport、波子GT3RS等經典名車。日系陣容亦不弱，出動日產Fairlady370Z、SubaruSTI同新鮮熱辣嘅凌志LFA等，連經典中嘅經典，現今價值過百萬嘅第一代戰神GT-R都有，車迷肯定睇到腎上腺素飆升。不過時間關係，大部份名車均屬曇花一現，要數齊真係幾考眼力。
電影官網： http://www.fastfivemovie.com/
免費請你睇戲
睇完介紹好想睇戲，我哋請你免費睇！只要將個人資料包括姓名、地址及電話，連同回郵信封寄到以下地址，就有機會得到《狂野時速5》的正場戲票及T-shirt，名額得10位，送完即止。
地址：安樂影片有限公司
香港金鐘海富中心第二期1212室
（信封面註明「索取《狂野時速5》禮物」）
鳴謝：環球影片
