就快又到6.4，今年大家再見唔到華叔，民主黨出嘅紀念冊《華叔，功成必有你在》趕及6月出街。華叔生前有令，民主黨不能在支聯會活動籌款，不過今年破例，紀念冊應該會在維園燭光集會上，送畀捐款支聯會市民，款項全數交支聯會，民主黨分文不收。
呢本紀念冊內容，係多個民主黨人撰寫懷念華叔心情，亦有義工、朋友記下與華叔共事多年嘅點滴，雖然唔係華叔親撰回憶錄，不過透過眾人文章，應該可以更全面、立體咁記錄華叔對民主、國事嘅睇法同立場，曾睇過初稿嘅黨內人士稱，呢本書唔係只係話當年，有啲鮮為人知事情。
司徒嬋疑管遺產
江湖傳聞華叔家人搞嘅華叔回憶錄亦想趕及年中出街，如果真係順利出爐，兩本書一齊睇，八方相信對了解華叔政見、香港近幾十年工運、社運、民運發展好有啟發性。《華叔，功成必有你在》編寫期間，據講華叔家人都好緊張，八方收到風，有人要求民主黨唔好亂用華叔家庭照或生活照，搞到民主黨一度擔心收到禁制令，本書隨時變成禁書。
華叔過身，佢嘅遺產，尤其係著作版權如何處置受人關注，八方聽聞一啲出版社同文化機構，月前收到華叔妹妹司徒嬋代表律師通知，想知版權、版稅情況，有人同八方講，相信嬋妹係華叔遺產繼承人或執行人，若然如此，日後就可以直接與嬋妹接觸，唔使勞煩其他家人。