名校出身的天水圍飛馬助教楊正光，未退役先想退役路。幸好未雨綢繆，一年上一個教練班，現手執B級教練牌，協助訓練12年倫敦奧運隊，「學咗啲嘢，返轉頭一定有用」。
中四念名校聖若瑟，已為獎學金運動員，未升中五先輟學，索性棄書從踢。光仔說當年未想過延續學業，「第日可能有機會讀返，踢波未必」。93年他17歲，已披上傑志球衣踢甲組，兩年後入港隊，同年加盟南華，又是山度士接班熱門人選。
日間練波晚上教練班
風光時期，踢甲組只靠獎金已夠餬口，「每個月踢四、五次，攞個冠軍已經夠」。30歲因拉傷腳休養三月，回來發覺世界不一樣，「羅生（南華足主羅傑承）大搞南華，球隊風格變，講究體力速度，發覺自己未必承受得到，開始諗退役」。日間練波，晚間上堂，光仔31歲取得第一張教練「沙紙」。
高峯過去，觀眾焦點不在你身，「一直當自己係小人物。球星又點，出到嚟咪又係普通人一個」，生活問題更大。盤算退役時很徬徨，「未見過工，有屋企要養，人工跌咗好多」。想過轉行，「有朋友從低做起，喺餐廳做到經理，有諗過不如邊做邊學」。至今卻不肯放走「成長好友」，繼續與足球同進退。他不住形容自己「好好彩」，「太太一直支持我，叫我揀自己想做嘅嘢，羅生話我喺南華機會唔大，不如過飛馬幫佢手」。
現任天水圍飛馬助教
機會留給準備好的人。在南華的最後歲月，光仔已協助教小朋友興趣班，轉會飛馬更讓他由球員轉型至助教。轉型後，他繼續報讀教練班，還學英文與電腦，「淨係識足球，但係留喺球圈發展，一樣要計劃。人哋點幫你點扶你，最後都需要靠自己」。
34歲的光仔找到事業方向，坦言從不後悔選擇足球，卻後悔放棄學業，「細細個有咁好收入，每年加人工，以為讀書唔重要。近兩年諗返，其實可以一路踢波一路讀書」。