中環人覓食範圍有限，日日食嚟食去都係嗰幾間餐廳、酒樓、酒店，悶到寧願節食，一海之隔嘅ICC，Ritz-Carlton重開，頓成貪新鮮中環人搵食新焦點，老友call八方去搵食，話開張無耐間意大利餐廳Tosca有名廚坐鎮，媲美以前中環Ritz-Carlton間名人飯堂Toscana，要去試吓究竟新不如舊抑或青出於藍。
大廚做過三星米芝蓮餐廳
老友叫到，八方卻之不恭，不過叫佢訂到枱再call，事關個個中環人都話要去試吓Tosca，搞到近日晚晚爆場；一般人訂枱，最快要等一個月！八方聽聞前高官葉澍堃、富豪趙世曾已率先幫襯，四太都好似曾經露面。
Tosca喺102樓，樓高兩層，俯瞰無敵海景，呢個view已經夠晒吸引，但過海搵食，都係食物味道緊要啲。大廚VittorioLucariello係前君悅Grissini、九龍香格里拉Angelini大廚，入行廿幾年，做過三星米芝蓮餐廳廚師，拿手海鮮及Pasta為主嘅南意菜。
Tosca招牌菜有雜菜沙律配水牛芝士茄子蓉、自製意大利麪條配紅蝦、燒多寶魚配八爪魚及茴香，撒手鐧係homemade意大利麪，用意大利麪粉、意大利雞蛋，意大利礦泉水搓麪糰，絕對正宗風味咁話。一位食過Tosca嘅老友話，以前Toscana個menu，應該同新嘅Tosca個menu幾唔同，好難直接比較，不過佢覺得食物水準可以好啲，上星期食晚飯，感覺主菜好過頭盤，但服務同環境就無話可說，有機會過海會再試吓。