馬賽曾經與吳卓羲拍劇傳緋聞，雖然兩人先後作出澄清，不過最近又有指兩人暗撻多時，更指女方向男方提供住所。馬賽昨日再澄清緋聞，直言報道屬無中生有，更表示與吳卓羲只是同事，工作之外沒接觸。
歐陽震華、胡杏兒、鍾嘉欣和馬賽昨日在電視城為無綫新劇《樂府藏龍》試造型，談到有指馬賽與「姐仔屠夫」吳卓羲再傳緋聞，更向男方提供住所，馬賽被問到此事，她坦言與家人覺得報道無稽，更多番強調報道不是事實兼無中生有。
馬賽說：「我覺得啲報道唔公平，之前已經否認過，一年之後又攞番出嚟講，我同阿Ron（吳卓羲）只係普通同事，我哋工作之外私下冇接觸同聯絡。」
家人曾規勸轉行
提到阿Ron澄清與馬賽不是朋友，她說：「我哋真係只係同事，對大家都唔好，我希望大家可以專注喺我哋工作。」馬賽又否認如報道所指是「有錢女」。
講到現實生活又會否貼仔？馬賽說：「我鍾意一個人唔係講錢，最重要係有上進心、有責任心、專一、善良同孝順，不過我入行三年都唔覺得有人追，我自己亦唔心急拍拖，專注工作。」馬賽不諱言家人曾經勸她轉行，但因本身喜歡演戲，所以堅持繼續。
歐陽震華為報恩
此外，近年專注拍內地劇的歐陽震華，今次在劇中會與麥包、胡杏兒和鍾嘉欣有一段四角關係，他說：「其實之前公司搵過我拍《法證III》，但係撞咗期所以拍唔到。」他更笑說：「喺內地拍劇為興趣，返嚟拍劇係報恩，但係成日報恩好辛苦，所以間唔中都為興趣。」
採訪：何慧斯
攝影：彭琮然