Ritz-Carlton由中環搬到九龍，昔日酒店內意大利餐廳Toscana冇重開，但由於Toscana實在係唔少中環人集體回憶、集體搵食嘅地方，因此即使變成Tosca，都要爭住去試吓，睇吓搵唔搵得返記憶中嘅味道。
新Tosca裝修新穎，Toscana就平平實實冇乜花巧嘢，好多人都係因為想食意籍名廚Bombana手藝而至，有人更形容佢係香港意菜「廚神」，四太梁安琪、關之琳、田北俊、馬時亨都係Toscana常客。Toscana每年舉辦白松露宴，慈善拍賣巨型白松露菌，係全城矚目大事。
08年1月中環Ritz-Carlton結業，Toscana有告別晚宴，酒店老闆林建岳請多名城中富豪名人高官到場食「最後晚餐」，Toscana傳奇落幕。