坐擁畢特及基士文兩大前英超球星嘅南華，前日作客印尼以2:4不敵佩西普拉，今屆亞協盃提早玩完。除咗「畢、基」仲㷫合合外，成班「少林兵」噚日下晝返港都冇晒心機；至於喺賽後一度好「火」咁喺微博大發牢騷嘅署理教練陳浩然，都回復平靜，並同班主羅傑承一樣，為球隊做唔到好成績開腔道歉。
球星就係球星，「畢、基」噚日一踏出離境大堂，就帶頭一支箭咁快步離開。面燶燶嘅畢特，好似用身體語言同大家講「唔好惹我」；至於基士文則批評亞協盃係「stupidgame」︰「賽制遷就晒主隊，好似今仗咁轉4次機，又要搭十幾個鐘，下午攝氏30幾度開波，令到我哋狀態咁差。」但講到會唔會離開球隊，文仔就話言之尚早，等agent遲啲嚟香港再傾；佢仲話即使香港足球水平較低，球隊成績唔好，都冇後悔過來港踢波。
說時遲那時快，呢期「紅」爆微博嘅署理教練陳浩然步出閘口。話說陳sir前日領軍輸咗畀印尼佩西普拉，令球隊提早喺亞協盃「畢業」後，一度喺微博發表「偉論」︰「中意鬧快D鬧，吾系遲D無得鬧！Comeon！」引起部份球迷不滿，差啲釀成罵戰，雖然呢句留言最終喺短時間內刪除，但陳sir此舉，相信都得罪唔少捧場客。
陳sir認衰會檢討自己
對於微博言論，陳sir噚日就無晒火咁回應︰「其實微博都係啱啱玩，本身諗住喺網上發表一啲嘢，同朋友傾吓偈，冇諗過突然會有咁多人回應，以後講嘢都會小心啲。」至於球隊交唔到成績，球員體能下降，佢承認係自己嘅責任，繼南華足主羅傑承前晚喺球會blog撰文道歉後，亦向球迷賠罪︰「可能之前帶大埔、大中太順利，對自己太有信心，加上第一年帶亞協，壓力亦比預期大，要檢討自己嘅能力，最終交唔出好成績，係要道歉。」
雖然羅生冇喺blog度提到要炒陳sir，早前亦講過會畀佢留隊，但陳sir都有晒心理準備︰「做得差被炒會接受，亦冇異議，但若然羅生仍畀機會自己留隊，其實自己都係一個o靚仔教練，唔會咁早收山，會吸取今季經驗，檢討自己；目前聯賽大局已定，但都會盡力贏埋個足總盃。」
