英格蘭U21領隊皮亞斯原來借咗聾耳陳隻耳，阿仙奴領隊雲格同埋利物浦領隊杜格利殊唔想旗下嘅新星踢到殘，講到明叫佢咪選自己啲球員打今夏嘅U21歐國盃決賽周，但佢就一於少理。日前呢個幼獅兵團教頭公佈U21歐國盃嘅40人初選名單，阿仙奴中場韋舒亞、利物浦前鋒安祖卡路爾、曼聯後衞基斯史摩寧同埋曼城後衞米卡李察士等英超球星，統統入選；而佢仲話，自己嘅球員生涯踢咗成1,000場比賽，仲打到40歲，所以唔認同雲格等人嘅見解。講真，話晒係爭U21歐國盃，唔通皮亞斯揀個弱陣去踢咩！另外站喺球迷立場，梗係樂意見到今夏U21歐國盃決賽周有韋舒亞同安祖卡路爾等球星啦。