結婚數十載，去年5月枕邊人葉青霖，決心赴台北玉佛寺出家，法號「常霖法師」，轉眼已過了一年時間，廖安麗可以告訴大家：「我生活得好好，做義工每日都好充實。」好朋友可以安心了。夫妻緣盡，不用死去活來，換個角度，總好過另一半變心，喜歡別的女人。
廖安麗（Annie）的丈夫葉青霖出家後，令不少至親好友擔心，這一年，她積極復出幕前，舞台劇、拍劇和做義工，重新適應單身生活，本月7、8日，Annie會與好友廖啟智演出舞台劇《斜路黃花》。
信緣份到此為止
Annie在戲中飾演智叔的太太，講述女主角愛老公的程度，連為他找妾侍生仔，也沒半點酸溜溜，很偉大的情操，她說：「部戲帶畀我好多反思，好似現實如果佢已經唔想一齊生活，我哋緣份就到此為止，我老公出家，我知道、我明白、我相信、我接受，一個女人，最重要有自己。」是否總好過老公有別的女人？她說：「Exactly！好多朋友關心我，但真係唔使擔心，我已經有咗心理準備十幾年，佢係出家，又唔係變心有第二個女人，又唔係死咗，使乜咁傷心。」
夫妻變師徒關係
Annie已學懂尋找自己的存在價值，忠於自己生命，她說：「我家生活好好，好適應，做義工先係我嘅正職，演戲係我嘅興趣。」兩位女兒在澳洲生活，她卻選擇留港，分隔兩地，她說：「嗰時喺澳洲生活8年，我形容為『8年抗戰』，因為我好鍾意香港，等於我兩個女住慣澳洲都唔肯返嚟。」她坦言沒想過找第二春，但緣份到也不抗拒。
與常霖法師關係有變，但Annie也會定時探望對方，她說：「我定咗7月去探佢，佢家將攝影融入禪修，嚟緊常霖法師會收20個學生，我係其中一個。」
採訪：溫敏芝
攝影：陳俊強