OMD發畀報館嘅信曝光之後，原來有好多人睇到英文原文，於是劣評不絕，前高官王永平就在佢嘅專欄痛批狠批之。上一輩高官對英文係睇得緊要啲嘅。一位現任高官飲茶時同左丁山講過：「當年做AO仔有位上司楊啟彥，幾乎日日俾佢鬧，我寫嘅會議紀錄、報告等等，俾佢好似英文老師改卷咁改，改完連埋成個快勞擲落地，要我自己執番，當時非常非常之冇癮，假假地我嘅英文考試成績好標青o架嘛，但現在回想起來，我嘅英文在under楊啟彥之時，確實大有進步。」呢啲情景若在今日發生，個AO仔相信會立即遞信辭職，跟住向傳媒爆料，睬你都儍；而身為高官嘅，今時今日識得慳番啖氣啦，無謂擺錢落你袋。
點解咁講呢？某日聽見一位在外國留學六年，滿口牛津英語嘅七十後中層經理講：「下屬有一位八十後，係本地大學畢業生，工作勤力，於是叫佢負責寫工作報告，會議紀錄，寫得幾論盡，英文句子不通，錯好多文法。」咁又唔修改吓？中層經理話：「關我乜事，我好唔得閒嘅啫，我地部門睇得明咪算咯！」唉，又要呻吓，當年左丁山有資格管一百幾十人之時，所有公司向外發出嘅英文公函，都要自己睇過先，事關公司聲譽吖嘛，我地呢類人，今天怕已成為恐龍。
寫到呢度，收到一位讀者R嘅電郵講TSA，佢話：「TSA的全名是Territory-wideSystemAssessment，中文譯名很不雅。TSA的中文譯名是：全港性系統評估。性系統？我讀書時，老師曾說寫中文不要亂用『性』字，不要以為加了『性』字，便可把形容詞變做名詞。我不明白為甚麼政府有這麼差的譯名」。
考TSA，學校極為緊張，拼命催谷學生，令家長緊張埋一份，要家長（按讀者R講法）叫仔女唔駛太緊張，盡本份就算，但確係有啲家長如F太咁唔高興嘅。教育局有啲課程時時改，但有啲則落後於時代，不變應萬變，如中學電腦課程，以往左丁山兒子讀電腦，仲要學指令式電腦語言，與佢日常上網之一手經驗，完全脫節，故此左丁山叫佢：「呢科唔駛讀嘞，肥咗就算」，兒子大喜，因而有時間溫習其他科目，幸保會考及格。對TSA嘅態度都可以係咁啫！雖則讀者R不以為然。