由蘇格蘭名宿林拔領軍嘅諾域治，前日喺英冠作客贏樸茅1:0，落實同攞咗聯賽冠軍嘅昆士柏流浪，來季齊齊上英超。猶記得諾域治上季仲喺英甲打滾，而且喺首場聯賽以1:7慘敗畀來訪嘅高車士打，估唔到之後越打越好，仲喺兩季升兩級，唔到你唔服。除咗老林拔醒，後生嗰個林拔一樣勁，列基林拔前日喺英甲梅開二度助修咸頓作客贏普利茅夫3:1，修咸頓家陣領先第3嘅哈特斯菲爾德3分兼喺得失球差方面多成17球，幾可肯定返英冠。
諾域治同修咸頓Happy到震，但卡迪夫城就超慘。喺英冠上半季一直排前兩位嘅卡城，前日主場爆大冷吞米堡3蛋，只能參加升班附加賽，記得上季卡城都衰喺附加賽，仲要喺決賽於反輸畀黑池，唔通今次又宿命難違？雖則卡城輸波，但場波出現咗個有趣場面，就係靚女助理球證麥絲（圖）俾卡城麥諾頓撞到瞓低，不過佢處變不驚，嗱嗱聲爬起身，執番支旗繼續執法。