香港地，揸筆搵食難，但四年來從未厭倦，只因一路奇遇不斷，大開眼界。像這篇稿，源於四月某夜看亞視，望到一首不錯的廣東MV，以為又是新人，谷歌一下才知此乃紅爆廣州的《廣州仔》，歌詞由黃毅成操刀，去年他與劉華合寫《Idon'twannasaygoodbye》。香港歌手配國產創作？有趣！打了幾個電話約訪問，過兩天已小明上身，踏「和諧號」上廣州。
記者：蔡倫斯
攝影：天狼星、艾力氏、趙臣東
鳴謝：環球唱片（廣州分公司）提供部份圖片
髮型：iSalon艾髮廊（東山少爺、鄭建鵬）
化妝：L'image利瑪仕化妝形象學院（東山少爺、鄭建鵬）
鄭建鵬（左）
26歲，全國著名的breakdancer之一。07年出道以來唱國語歌為主，《廣州仔》是其第一首廣東歌。
東山少爺（右）
原名廖寰，28歲，於星海音樂學院畢業，曾推出《唱好廣州》1及2兩張專輯，大獲好評。去年推出第三張個人大碟《三世書》。
黃毅成
33歲。曾為內地歌手海鳴威、高遠及魏雪漫填寫國語歌詞；06年為東山少爺打造首張廣東大碟《唱好廣州》。
天王Hit歌填詞人
「和諧號」列車從羅湖出發，一個鐘過少少便到廣州東站，快過我由新界北的家坐車回將軍澳堆填區。轉乘廣州地鐵，到公園前站下車，終於來到動漫星城的星巴克──跟黃毅成相約的地方。時為周日，咖啡店嘈過酒樓，點做訪問？「去『潮樓』啦！」他建議。就此，穿過最繁華的北京路步行街，來到「潮樓」商場的「仙仔」，方知道這是廣州人對「仙踪林」的稱呼，而這家店別稱「潮仙」，有如港人當年口中的「旺地恒」。坐定，唞順氣，訪問開始，最想知道當初為何會幫香港歌手填廣東詞，還要一來就是萬人迷劉華？架起眼鏡的黃毅成語氣認真又帶點不經意說是緣份安排。「平時我都有同唱片公司打交道，經朋友介紹，識咗劉德華嘅（唱片）監製陳德建，佢叫我得閒試吓填詞，填咗之後佢覺得幾好，就由上一張專輯嘅《恩賜》（09年《希望．愛》），到今次嘅《Idon'twannasaygoodbye》（2010年《忘不了的》）都有份填，我知佢晚晚演唱會都唱呢首歌，但唔知首歌hit到咩程度。」咪就係紅到連詹瑞文都忍唔住改編成《Idon'twannasay仆街》，YouTube獲二百萬點擊率囉！黃毅成約十年前開始音樂創作生涯，包辦曲詞，剛出道時簽約台灣音樂人涂惠元的龍族音樂，後來索性自行代理。當時作品主要寫給內地歌手，反應不俗，如魏雪漫的國語歌《Tequlia》曾奪上海東方風雲榜三連冠，但仍跟廣東歌沾不上邊。
網上首日轉載即上萬
直至03、04年數次遊歷歐洲，驚覺當地人對本土文化保護意識超強，法國尤甚，「佢哋唔鍾意講英文，見面第一句要講Bonjour，畀法國人覺得你尊重佢哋嘅語言。」在巴黎發現很多小café當年竟然有海明威這樣的大文豪顧客！他有感而發：「巴黎真係一個好有故事嘅城市，歷史上好多知名藝術家都喺度生活過；廣州都有兩千幾年歷史，亦有好多歷史名人，應該有好多嘢沉澱出嚟，我相信通過包裝可將呢啲寶貴嘅文化遺產宣揚開去。」06年，推出《唱好廣州》專輯，將粵曲、R&B、HipHop、廣州童謠和數白欖的方式，去演唱西關、長堤等廣州事物，大獲好評；翌年再推出第二輯，一首《劍合釵圓帝女花》連香港都有人識；去年底與拍檔蔡曉恩創作《廣州仔》，紅到幾乎所有廣州人都聽過，「網上第一日嘅轉載量都已上萬，街外大屏幕都會播MV，電台、公車、的士都經常播，主要頻道嘅排行榜都攞冠軍。」唔止，廣東電台音樂之聲早前舉辦的「音樂先鋒榜2010頒獎典禮」，十首內地金曲，只有它跟張敬軒的《Deadline》廣東歌，「我諗紅，主要係聽歌嘅人搵到身份認同感。」
廣州就是草根文化
觀察所得，能夠紅到香港的廣州「廣東歌」及「廣東歌手」，近年只有張敬軒，何況大家都早已當他是香港歌手了吧?!所以難怪《廣州仔》一出就在廣州熱爆，主唱的東山少爺和鄭建鵬（Ares）都說，廣州鮮有廣東歌，既因不重視包裝，亦由於社會氛圍。東山少爺說，跟香港的商業化不同，草根文化是廣州的標記，這樣限制了流行音樂的成長，「喺廣州，無論有錢人還是平民，兩類人嘅形象都係差唔多，會踢拖着孖煙囪行落街食大牌檔，有可能喺你隔籬講緊嘢嘅人就有幾十億身家，所以（音樂製作）唔可以太過商業，因為佢哋心理上會接受唔到。」鄭建鵬補充說，很多人都覺得廣州沒有樂壇，「唔會有歌手唔會有作詞人作曲人！」反而香港就甚麼都可以跟娛樂沾邊，「香港人好關注娛樂，好多人手上都會攞本漫畫或八卦雜誌，反而廣州人就會睇報紙或者文藝雜誌，就算後生仔女睇八卦雜誌，99%都係嚟自香港。另外所有企業都可以同娛樂有關，藝人嘅機會多好多，美容院或快餐店都會搵藝人做代言；喺廣州極少，一係就搵北方或者香港明星，但就係唔搵廣州。」
流行音樂不能不包裝
時代變了，Ares認為，「正如你所講，就算當年麥子杰到香港跟陳秀雯合唱，感覺都仲係娘，廣州人一直畀人嘅印象就係唔注重包裝，到家唔少行家仲係去批發市場買衫自己襯！」他倆就坐在對面，望真點，確實跟我在家看到在南方衞視或珠江台演出的藝人有點不同，衣着較trendy。Ares說：「我哋希望拋棄以往只注意歌曲，其他咩都唔理嘅諗法！」但都要歌曲內容有共鳴先能喚起市民注意，東山少爺點頭認同，他說《廣州仔》正是想以最新演繹方法唱出廣州潮的一面，所以黃毅成的歌詞內有「iPhone」、網絡潮語「OhmyLadyGaga！」，亦有「遇上女神就要but豬扒咪踩」，跟港人日常用語頗貼近呀，再不是傳統廣州流行歌只顧講舊時，「廣州人好念舊，成日都講舊嘢，但呢類歌少爺已經唱過好多。」如果各位香港特區讀者還以為廣州流行音樂「老套」，或誤會《小明上廣州》是當地派台作品，請務必試聽《廣州仔》。
YouTube連結： http://www.youtube.com/watch?v=84oUgsm2Ec0
廣州仔MV
又一廣州土炮詞人
論廣州土炮填詞人，除了黃毅成，還有比他年輕10歲的陳小廣。樂壇新貴CAllStar的《全情關注》、《樂天女孩》正是出自其手筆。話說，CAllStar監製阿簡（簡敬慈）去年組合初出道時曾在「原創音樂協會」網站發英雄帖徵召填詞人，阿簡看過小廣填的不錯，遂邀請合作。到真正落筆寫《全》時便發現難度：「好多時廣州人嘅用語同香港人唔同，例如呢度叫『刷新』，香港就叫『refresh』，有好多詞用咗阿簡都要我改！」但阿簡則說：「小廣寫得好地道，寫出香港人用微博嘅感覺。」不過他沒有刻意區分填詞人是港產還是國產，因為粵語歌是一個區域的產物，又說，不認為香港人找內地人填詞會成為主流，「樂壇有幾個外援講唔上係一種現象！」
