喺前個月發生嘅日本311大地震，仙台係重災區之一，全市滿目瘡痍，仲好似人間地獄咁；而佢哋嘅日聯球隊仙台維加泰，陣中嘅新簽巴西前鋒馬昆奴斯仲驚到走埋。但咁反而成為咗維加泰嘅正能量，喺聯賽重開之後連贏3場，家仲做埋榜首，用超勁開季成績嚟幫市民打氣。
無懼大牌前鋒出走
維加泰季前引入兩個前鹿島鹿角射手馬昆奴斯同埋柳澤敦，實力大增，仲喺首場聯賽作客打和廣島三箭0:0。但喺地震之後，佢哋班職球員經已身心受創，最慘就係，馬昆奴斯以患上創傷後遺症為理由而解約離隊，柳澤敦則因喺4月中做左膝手術而要休息個半月。一下子冇咗兩大前鋒，佢哋亦俾人睇死喺聯賽重開（4月23號）之後，隨時任人魚肉。
但係足球就係咁奇妙，維加泰卻能夠化悲憤為動力，喺聯賽重開首場聯賽，爆大冷作客反勝川崎前鋒2:1，之後喺上個禮拜五再喺主場贏06年盟主浦和紅鑽1:0。噚日喺主場對福岡黃蜂，佢哋憑赤嶺真吾奠勝贏1:0，家仲以3勝1和嘅成績，做咗聯賽「1哥」，奪標賠率亦由季前嘅125倍，落飛至得番80倍。維加泰社長白幡洋一就話：「外界對仙台嘅支持，簡直超乎想像，這令到我哋隊波更加團結一致。」
日聯重開3連勝
中場關口訓充則表示：「如果你喺地震當日見到呢度嘅一切，你絕對唔會諗到我哋可以再踢波。我哋好高興見到居民嘅生活逐漸回復正常，而我哋亦會合力，令仙台回復原貌。」反而唔係喺災區嘅福岡黃蜂，表現就差到你唔信，開季4場聯賽輸晒，而且仲入得1球；而季前被捧成奪標第4熱門嘅紅鑽亦一樣咁屎波，4戰1勝3負。維加泰嘅傳奇故事，唔知可唔可以激起佢哋兩隊嘅鬥志，之後打番好啲呢？