所謂「人不可以貌相」，一位分析員朋友，叫華華留意吓經營內地零售及批發商場嘅人和商業（1387），仲以為公司條數有問題，點知佢係叫華華睇睇主席戴永革（圖）份糧。唔經佢提醒，相信冇乜人留意呢間市值280億港紙嘅公司，主席年薪一啲都唔嘢少。齋計底薪戴永革已經有3146.4萬蚊（人民幣．下同），連埋花紅同股權，上年淨袋6745.4萬，計返港紙成7000幾萬銀。
究竟有幾高，佢唔單止超越碧桂園（2007）楊國強、富力（2777）李思廉等內房股老闆，連市場向來關注內地上市公司薪酬最高嘅平保（2318）執行董事張子欣同董事長馬明哲都比下去。張子欣舊年年薪1067.2萬蚊，馬明哲就有987萬。舊年香港上市中資老總年薪最高嘅阿里巴巴（1688）首席執行官衞哲，都只係3629.9萬銀！據分析員朋友講，戴永革份糧應該躋身香港上市公司主席十高之列。