多得阿仙奴中場艾朗藍斯嘅一腳，令到英超聯榜首緊湊起嚟；亦多得奧斯卡影后查理絲泰朗嘅打氣，令到下周日曼聯迎戰車路士嘅英超榜首大戰，更加矚目。
踏入球季季尾，歐洲主要聯賽嘅榜首形勢都大定，德甲多蒙特已經奪標，意甲AC米蘭喺最後3場聯賽攞1分亦封王；而西甲嘅巴塞隆拿亦放離皇家馬德里9條街，足智彩嘅奪標賠率都只係得1倍……，真係冇晒懸念。
費Sir：我哋會重整旗鼓
好彩仲有英超。由於榜首嘅曼聯喺周日聯賽大戰，俾主場嘅阿仙奴中場艾朗藍斯一腳射垮，令紅魔喺英超嘅榜首優勢大減，只係領先次席嘅車路士3分；兩隊喺下周日嘅榜首大戰，就成為英超冠軍前哨戰。
對於星期三要迎戰史浩克04踢歐聯次回合，而下周日又要迎戰車路士，連身經百戰嘅曼聯領隊費格遜亦話，未來7日對紅魔鬼嚟講係非同小可，佢仲揚言喺周三之戰會變陣㖭！費爵爺話：「我哋會重整旗鼓，喺星期三時一定會變陣，我會重召中場史高斯、前鋒貝碧托夫同埋奧雲。」
咦？點解冇提喺對阿仙奴時收起嘅中場傑斯？唔通老費諗住等呢名37歲嘅老將再唞多場，等佢養精蓄銳鬥車仔？對此老費就話：「球隊喺現階段係好需要有經驗嘅球員，而無論喺歐聯抑或英超而言，我哋嘅形勢仍然有利。」即係話主動權仍喺紅魔手啦？收到！唔怪得之足智彩開出曼聯喺英超奪標賠率，熱到得1.17倍。
查理絲泰朗愛「車」
值得一提嘅係，喺阿仙奴對曼聯嘅賽事，奧斯卡影后查理絲泰朗（CharlizeTheron）都係座上客，而當佢睇到艾朗藍斯入波後都不知幾興奮；不過，大家千祈咪誤會佢係「廠迷」，原來佢係車路士粉絲至真。查理絲泰朗咁興奮同開心，都係因為見到曼聯失分，令車仔衞冕機會大增啫！既然呢位南非靚女咁鍾意足球又咁捧車仔，如下周日佢去奧脫福捧場，肯定令球場生色不少呀！
阿仙奴復刻戰衣接受預購
阿仙奴件125周年復刻版戰衣噚日起在官網接受預購，禾確特着住擺甫士（圖）之餘，官網仲有段由法比加斯、基捷基治、艾沙維、桑治同施捷斯尼，串演模特兒嘅宣傳片。新球衣比較特別嘅設計，係有好多塊葉圍住個隊徽；據官方資料講，左邊15塊月桂葉，右邊係橡樹葉，其中月桂葉象徵力量，亦係紀念當年15個人付出6便士成立球會。另外，波衫冇白色領圈，白色袖嘅紅色邊亦唔存在，簡單，勝在歸一。
