香港小姐一蟹不如一蟹，反而金融圈選佳麗仲有睇頭！先旨聲明，華華欣賞女人唔係睇外表。為紀念國際婦女日一百周年，《AsianInvestor》（亞洲投資人雜誌）特別選咗喺亞洲地區資產管理行業25個最具影響力嘅女性行政人員、投資者同企業家。據講前後有超過80個候選「佳麗」，呢25位獲選者，可以話非常難得，因為涵蓋唔同界別。
今次選出嘅25位佳麗，來頭唔小。為人熟識嘅包括星洲總理夫人、淡馬錫控股行政總裁何晶。至於香港方面，代表佳麗有證監會副行政總裁林張灼華，同貝萊德董事總經理同安碩亞洲除日本外主管李婉雯。仲有西京投資主席劉央，唔單止金融圈中人對佢熟識，一眾散戶更加封佢為「女股神」。為隆重其事，6月下旬喺香港會舉行慈善宴表揚呢班得獎佳麗。