【本報訊】丙崗將有30多戶非原居民受發展影響。有村民知悉面臨迫遷後，走到正與恒基進行拉鋸戰的粉嶺北馬屎埔，主動向保育團體求助。
「有份建設呢條村」
丙崗非原居民Shirley表示，最近向路過的行山友解說丙崗面臨豪宅化，希望藉公眾壓力迫使城規會否決更改土地用途申請，「點解咁靚嘅郊野一定要起豪宅？係咪搞到我哋好似菜園村咁，政府先安樂？」另一非原居民侯先生稱，近日開始有人游說租戶自行遷出，「佢話我哋唔可以阻住人發展，但我哋有份建設呢條村，間屋係自己起，有冇尊重過我哋嘅居住權？」梁先生是丙崗村第一代非原居民農民，「我淨係鍾意耕田。希望發展商畀條生路」。
反對發展計劃的原居民侯先生要求發展公司與地主共同承擔租戶賠償，「發展都要顧及民生。合約話唔交吉成交價就減半，即係逼地主趕人走」。
丙崗村代表侯添興認為，租戶應自行與個別地主商討安排，「你租我嘅地，我就有權收返。如果能力做得到，就賠畀你囉。我哋好斯文，唔會亂嚟」。
新界東北發展關注組成員陳劍青指出，簽約收取誠意金的手法由田生集團所創，現正入侵鄉郊，呼籲原居民簽約前三思，「一簽咗就會喺限期內綁死自己，必買必賣冇得轉讓。但係發展商可以退定，低成本冇風險」。