舊年7月就冇喺華富嘉洛返工嘅股評人黃偉康，搵埋富昌證券前總經理藺常念諗住另起爐灶，不過搵食大計由2月講到家都只聞樓梯響。華華收到風，之前話係背後老闆之一嘅藝人徐淑敏老公黃浩，決定唔玩。
未曾開張已唔玩，搞邊科？據聞舊年10月，黃偉康同藺常念搵黃浩入股開證券行，仲同佢講搵到嚟自大陸同新加坡兩地嘅老闆夾份。由於黃浩自己都炒開股，如果有檔嘢就可以「肥水不流別人田」，所以二話不說就應承咗。
老闆未科水先縮沙
點知今年2月，黃、藺兩人突然同黃浩講，大陸同新加坡老闆縮沙，叫佢一個人食晒。黃浩始終係門外漢，加上自己仲有盤飲食生意，所以亦都拒絕再玩。
咁黃偉康同藺常念檔嘢點收科呢又？華華問過藺常念，佢老人家話家仲申請緊牌照同請緊員工，拍檔係黃偉康，幾時開檔就講唔到，唯一肯定係黃浩唔係老闆或者股東。
至於黃浩就唔否認拒絕再玩嘅傳聞，話家專注做好自己嗰瓣。華華問佢點解無啦啦「玩」兩個名嘴，佢就呼寃話自己好認真，唔係玩玩吓，就連黃偉康話要租ICC（環球貿易廣場），都幫佢哋安排上去睇，你知啦，ICC唔係話要睇就有得睇，大業主新地（016）要你提供銀行擔保先畀你上去。
夾份變獨資，又難怪黃浩跳船嘅。華華收到風，黃、藺兩人仲搵緊水喉，開唔開到檔仲係一個問號。
李華華
mailto:[email protected]