【本報訊】「表面上就28蚊，實際上一個鐘都唔夠14蚊！」勞工處聲言加強巡查，惟最低工資法例實施三日已形同虛設。於單幢式大廈任職保安員的John（化名），僱主以無法負擔為由，僅將其平均時薪由12.1元微調至13.2元，年逾70歲的他迫於無奈接受，「我哋冇得爭喇，直情冇得鬥。」
做10小時作8小時計
John做了保安員15年，月薪不足5,000元，每月開工30日，無年假也無法定假期，若請假要自費聘請替工，是基層勞工最受剝削的一群。他說月薪全給內地妻子養病，每月僅靠1,000元生果金過活，一直寄居友人家，「慳到差唔多要執嘢食」。他任職的大廈有逾100住戶，雖聽聞將加管理費，但業主立案法團仍堅持：「28蚊畀唔到你」。
最低工資是好是壞，John不敢判斷，他只說自己年紀大，又於舊式大廈工作，只求月薪7,000多元已心滿意足，「如果28蚊，（人工）就要成萬蚊，我問自己都冇可能收一萬蚊」。他沒想過舉報僱主，怕飯碗不保。
僱主扮窮公然違法，也有無良僱主教唆員工「講大話」。原兼職外賣工的Mary（化名）說，前僱主只給她時薪17元，「佢話任何人問你，都話有28蚊工資」，她不欲同流合污，毅然辭職，店內其他外賣工卻要被迫說謊。另一基層勞工Peter（化名）說，早前到九龍區一間茶餐廳見工，僱主以時薪28元聘請他，但返10小時當8小時計算，變相「八折」支薪，「擺到明犯法，佢話全世界都係咁，唔通畀足28蚊你咩！」
社區協會組織幹事吳衛東批評政府空有法例監管，尤以保安、清潔及飲食業為剝削重災區，促請勞工處加強針對性巡查。