香港地揸車容易泊車難，即使畀錢泊入停車場，都唔係次次可享有物有所值嘅服務，有時停車場的騎呢設計，隨時令車主掉入「萬劫不復」之地，進退兩難！有部份停車場更被冠上地獄停車場之名。綜合司機們及網友留言，找出港九各地的地獄又或唔Like嘅設施，以後搵停車場有晒心理準備之餘，又可避免貼錢買難受！
記者：趙慧敏
攝影：譚盈傑
Model：Rika@GME
最戇居 要爬要擒
採用八達通出入閘機，無非為方便，減少人手運作，偏偏喺將軍澳領都住宅入口處的出入閘，唔知玩車主定玩保安，雖用八達通出入閘，不過基座就被石躉墊高半呎，普通私家車泊喺旁邊，任你爬任你擒，除非落車，否則都無可能拍到卡，最終咪要搵個保安長期守候，幫車主拍卡囉！戇居設計實至名歸！
最恐怖 簽名留念
這個位於佐敦德興街的時租停車場，早被網民稱為地獄之首，進入停車場雖不至有入無出的死狀場面，但如果座駕較大件，進入停車場時難免要在牆身或車身「簽名」留念。單睇入口都屬高手級司機專利，入口寬度只可容納一部中型房車，想揸架豪華七人車入去？扭多幾手軚之餘，仲要睇好唔好彩，事關德興街泊滿車，如果入口對面位泊咗部車，塞咗半邊路，想入都幾難。
由於停車場位於舊樓中，場內布滿粗大柱位，路窄彎多，泊車時經常出現前面頂車，後面頂柱的場面，搞到進退兩難。上落的斜路傾斜度頗大，如座駕Low底咗又或頭唇貼地的跑車，就務必小心，否則刮車底或弄花頭唇，就肉都赤埋。
最牙煙 聞架色變
喺旺角泊低部車唔係易事，本來位於金雞嘅停車場真係幾方便，不過這個設於地庫的停車位，採用兩層升降架泊車，就嚇怕不少車主，尤其是早前發生「冧架」事件後，擺放上層的私家車成個車頭「啄」咗落地，搞到好多車主「聞架色變」，唔敢將車泊上車架。
最陰濕 神秘水箱
第一次駛入紅磡國際都會停車場，真係無諗過個名就咁勁，但停車場就咁陰濕，不過唔係設計陰濕，而係不少車位之間的位置都擺放神秘水箱，無留意隨時成架車「隊」埋去，最弊仲有水箱不時流出唔知清水定污水，搞到場內水迹處處又濕，行起嚟真係要打醒精神。
最臭 垃圾為伴
雖然話關埋車廂乜都聞唔到，不過出入停車場，都難免要開窗拍卡。這個位於香港仔中心的停車場，與垃圾站為伴，單單停喺門口影相，一股臭氣已經迎面而至。未到炎夏已經係咁，遲啲熱啲，容乜易臭味打孖嚟！
