防水MP3機　耳筒變耳塞

防水MP3機　耳筒變耳塞

最近日頭成30℃高溫，仲忽然橫風橫雨，唔覺唔覺又到夏天，係時候上山下海周圍玩！但玩還玩，有音樂聽吓自然無咁Dry，用iPhone聽歌又怕佢花、又怕佢濕，好難盡興！Speedo新推Aquabeat2就啱晒班運動友，支援三防MP3機，樂極唔怕生悲！

記者：王震遠
攝影：譚盈傑
Model：JoJo@Inspire

播足20個鐘

今次推出呢款運動型MP3機，並非音響工廠出品，改由著名游泳服飾品牌Speedo主理，名叫Aquabeat2。
事隔半年，二代目最大改進，係容量由1GB、2GB升級到4GB，內存可以儲到約2,000首歌；為咗照顧戶外活動用家，機身設計特別輕巧，並採用內置式電池設計，長氣到可勁播20個鐘MP3，玩過夜都唔怕無電。
機身按鍵幾簡約，六個掣已操控晒所有功能，由開關到揀歌到搞妥，機身上有個LED螢幕，可以Show晒播緊咩嘢歌。

■耳筒外表甚有Speedo味，仲有耳塞功能。

■3.5ｍｍ頭可駁USB叉電過歌。

■唔對應中文檔名有點可惜。

■玩防滑設計，濕晒都唔跣手。

■內置收音機功能，落水照收。

■防塵功能最啱行山人士。

3m潛水

有名你叫Aquabeat2，又係Speedo出品，估都估到佢同防水有關；一般防水MP3機只可防到簡單撇水，Aquabeat2最深可承受3m水壓。
不過更細心，係佢仲加入咗「浮水」設計！簡單講，就係當你唔小心，成部機跌咗落水，佢會自動蒲番上水面，唔使你落池底摷。
跟機耳筒亦經過特別設計，你以為佢係普通入耳式耳筒就錯晒！經小記實地測試，落水後你仲可以當佢係耳塞嚟用，同樣玩防水，以後喺水底都可以聽到歌啦！

■步行計方便鍾意跑步嘅KeepFit一族。

防撞陸用機

話明三防機，除咗防到水，Aquabeat2仲可以防到塵，去到戶外運動都唔怕入沙入塵。另外防撞功能啱晒鍾意陸上運動嘅用家，親身試過跌機落地下，結果無花無爛，仲一直Play住歌㖭！
機身仲內置收音機、步行計同計時器呢啲功能，唔聽歌都可以聽到電台節目，仲可以計住自己跑咗幾多個圈，機身後有個夾仔畀用家夾喺衫上面，跑步要計時都唔使伸手入袋摷iPhone，完全啱晒KeepFit人士嘅需求！

■親身試跌，真係無花無爛。

■有青綠、桃紅同黑三色選擇。

Aquabeat2　$1,390

內存：4GB
防水深度：3m
功能：音效播放、收音機、步行計、計時器
播放時間：20小時

■跌落水佢都識自己浮出水面。