又到五一黃金周，金行係自由行旅客嘅掃貨熱點。噚日旺角五間周大福金行都人山人海，但係上門嘅並唔係內地豪客，而係專登嚟找晦氣嘅美孚居民同響應佢哋嘅人民力量成員。有份撐場嘅「星屑醫生」歐陽英傑，上次踩場變咗走入去買金。佢呢鋪佢終於威番次，忍得住手之餘，仲成功勸阻自由行女士入去幫襯。
封鎖入口冇生意做
噚日成百人穿梭喺彌敦道兩邊，連環封鎖五間周大福金行，反地產霸權。喺魔鬼喇叭刺耳效果助興下，請願人士帶齊晒紙紮祭品，要送畀新世界集團主席鄭裕彤兩仔爺，結果又要出動保安同警員封鎖入口，生意就梗係做唔成啦。
同新世界關係密切嘅祥達發展，自從宣佈要喺美孚前油庫用地起樓之後，同美孚當區居民嘅關係勢成水火。祥達入稟控告六名美孚居民同區議員阻住工程進行之餘，仲要告埋所有上個月有份參加千人瞓街抗爭嘅「第七人」，呢個舉動辣㷫唔少人。美孚居民將包圍周大福行動升級，每間周大福分行外面都棟一堆人，搞到金行保安同警員兩頭騰，反轉旺角咁滯。
上次包圍周大福時，一向熱心社運嘅星屑醫生為咗入到周大福金行，私自用咗800幾蚊買咗條狗仔足金電話繩，事後俾身邊啲朋友鬧佢老襯，認為佢呢個行為係變相助長咗地產霸權。
星屑醫生噚日終於學精咗，聯同人民力量嘅成員，用普通話苦口婆心話畀啲自由行旅客聽，地產霸權搞到啲基層市民有幾慘，真係有旅客俾佢哋誠意打動，堅決去幫襯其他金行。老實講，在場示威者不斷嗌「周大福買金，老婆都變心」、「周大福買金，禮金變帛金」呢啲咁唔alright嘅口號，就算有心買金畀老婆同做禮嘅客，聽到都遲啲先買啦。
反對興建美孚新邨屏風樓工作小組話，經過噚日嘅抗爭行動後，目前最重要係集中精神應付被控阻礙工程單官司，話晒祥達要求索償百幾萬，工作小組成員私底下都認有啲驚。不過，佢哋堅信四個字：「理直氣壯」。上個禮拜法庭已經否決咗祥達申請臨時禁制令，不過單官司一日未判，冇人可以預計結果係邊個贏！
mailto:[email protected]
