【澳門直擊】楊千嬅前晚在澳門開騷，老公丁子高率大班親友撐場，當晚是無綫優秀選，一向傳和TVB關係麻麻的千嬅無獎，她指演唱會緊要過攞獎。當日有個唱工作人員添丁，千嬅也說希望盡快生B，但今年要做巡迴騷，所以造人計劃要延遲。
楊千嬅前晚舉行巡迴演唱會澳門站，原來入行15年的她是首次在當地開騷，老公丁子高率父母、外父外母和朋友等共60多人撐場。千嬅前晚high爆，跳舞時fing甩假髮，最後索性除掉假髮。唱《可惜我是水瓶座》時千嬅又做喊包，她說：「我比較眼淺，每次做演唱會就好似時光隧道，上親台都諗唔知仲有冇機會開。15年嚟大家對我嘅包容，多謝朋友家人，以前可以無條件任性，因為仲有青春，以前好易喊，因為我係喪。」
捧蛋在所不計
千嬅感謝工作人員時，在耳機得知有工作人員當日做老竇，她說：「好兆頭，希望下個輪到我。」完騷後千嬅受訪，問她是否恨生仔？她直言：「嚟緊要去唔同地方做巡迴演唱會，今年唔生得住，話晒得到亞太區最受歡迎女歌手，點都要做番啲嘢，唔係會心虛。」
個唱當晚是無綫《2011勁歌金曲優秀選第一回》，千嬅未能出席，結果沒有獎，亦有傳因她和無綫關係麻麻才食蛋，對此她說：「演唱會一早定晒，巡迴點都緊要好多。」是否代表演唱會重要過攞獎？她謂：「唔可以咁講，冇獎攞我又邊有咁多歌唱？」
籲鄭中基珍惜
提到前男友鄭中基日前拖大肚女友余思敏逛街買BB用品，千嬅大方說：「好呀，新生活要好好珍惜，仔女緣就更加，祝福佢生個肥肥白白BB。」
採訪：胡比
攝影：黃文成