過去幾年，內地同胞趁5.1黃金周來港，不外乎觀光購物，了無新意，但今年正好遇上戲院熱播3D情慾片《3D肉蒲團之極樂寶鑑》，同胞多了新節目入場飽眼福，該片至今票房衝破3,000萬大關，監製蕭定一估計一半票房進賬來自同胞的荷包。電影公司食髓知味，計劃與旅行社合作，在港包起戲院長期獨家上映《肉》片，看來日後戲院變景點，足可媲美海洋公園。
全球首部3D情色片《3D肉蒲團之極樂寶鑑》上映至今18日，截至昨日票房已達3,000萬，既成為今年在港上映的華語片票房冠軍，更成為香港三級情色片票房史上的第二高，有望挑戰由梁朝偉和湯唯合演、以4,900萬高踞同類片種票房No.1的《色，戒》。儘管《3D肉蒲團》被網民狂抦雷神雷凱欣老點露點，立體性愛場面又冇料到，但越鬧票房越火爆，且近日正值5.1黃金周，連續幾日假期必令票房數字繼續攀升。
1,500萬票房來自同胞
同胞黃金周殺入香港消費，令《肉》票房上升，該片監製蕭定一估計，五成票房源自同胞奉獻，他昨日在電話中說：「估計3,000萬票房中，有1,500萬嚟自同胞，真係多謝晒佢哋，估計個勢部戲票房可以去到3,500萬到3,600萬。」《3D肉蒲團》除了開創立體情色片先河外，也成功開拓了中國性電影之路。近年香港片商專吼擁13億人口的內地市場，尤其興起中、港合拍片後，從來只有華語電影在內地播映，卻從未試過像今次《肉蒲團》般，內地觀眾為爭睇雷神風采，竟然移船就磡來港睇戲。
《肉蒲團》雖是內地禁片，但內地觀眾同樣越禁越想睇，難怪該片會吸引大批內地遊客組團來港捧場，同胞入場時看得興奮，還犯禁拿手機偷拍，因而觸發電影公司打蛇隨棍上，計劃與旅行團合作，包戲院長期獨家播映《肉蒲團》，日後內地遊客來港，嫌海洋公園去到悶，大可看場《肉》片刺激感官。
門票半價戲院變景點
據悉，拍攝《肉》片的一元製作公司有見獲內地觀眾熱捧，已打算電影在港降溫後，展開第二輪搶錢攻勢，就是包起戲院長期獨家播放，鎖定內地遊客為目標，首選在尖東的華懋戲院播映，因位處旺區，院外又可停泊旅遊巴，次選是九龍灣影藝戲院。目前電影公司仍就此事磋商中，若落實的話，可能每日播兩場，以半價戲票刺激遊客入場。
《肉》片出品人蕭若元日前接受記者訪問時，直認有意長期包院供內地觀眾睇《肉蒲團》，因他相當睇好中國性電影市場，他說：「呢個market有得做，套戲上完首輪後，我會同旅行團合作，喺香港book一間戲院長期做《肉蒲團》，日一場夜一場，不停有大陸人落嚟，戲院就會變景點。」
賣埠強勁計劃開續集
對於內地禁播情色片，蕭若元笑說：「部戲我會擺喺度，等佢開放三級市場，但可能要等蕭定一個仔大，我雖死有子傳焉，子又有孫，子子孫孫無窮盡焉，我就唔信你唔開放三級片市場，30年、50年好冇？呢個世界乜嘢都改變中，始終有呢一日。」
由於《肉》片票房強勁，蕭若元計劃開續集，他說：「續集都諗緊，因為啲埠好犀利，但開續集只係用《肉蒲團》個名，角色已經死晒，要諗過。」
麥當雄和麥當傑兄弟也是當年《玉蒲團》的功臣，未知蕭若元會否跟麥氏雙雄再度聯手合作？他說：「麥當雄同我成日見，麥當傑就不嬲喺市場度。麥當雄本來有個雲石市場喺成都，家俾政府收番，佢收番筆錢，家發咗達。兩年前我初初搞《肉蒲團》已經叫佢幫手，佢唔肯之嘛，話冇興趣，家佢有題材係會考慮，早八、九年前佢都寫咗個劇本《金瓶梅》，家都攞出嚟拍。」
採訪：夏琴
肉蒲團稱霸2011票房
綜觀今年上半年的本港電影票房，華語片吐氣揚眉，除有《3D肉蒲團之極樂寶鑑》外，賀歲片《我愛HK開心萬歲》也有不俗成績。至於《哈利波特—死神的聖物1》雖然錄得4,482萬票房，但由於該片於去年底上映，故不計算在排行榜內。
排名1 電影：《3D肉蒲團之極樂寶鑑》 票房：3,000萬
排名2 電影：《我愛HK開心萬歲》 票房：2,654萬
排名3 電影：《潛行深淵3D》 票房：2,185萬
排名4 電影：《新少林寺》 票房：2,028萬
排名5 電影：《最強囍事》 票房：2,025萬
排名6 電影：《黑天鵝》 票房：1,864萬
排名7 電影：《3D魔髮奇緣》 票房：1,419萬
排名8 電影：《青蜂俠3D》 票房：1,386萬
排名9 電影：《單身男女》 票房：1,200萬
排名10 電影：《讓子彈飛》 票房：1,132萬
資料來源：《蘋果》資料室