《3D肉蒲團之極樂寶鑑》自開畫後勢如破竹，截至昨日已突破3,000萬票房，暫成今年華語電影票房No.1。該片投資者兼製作人蕭若元和兒子蕭定一夠吉士一鋪搞掂，賺了錢也賺了名聲，老蕭有本錢繼續做老頑童遊戲人間，兼職開戲，正職玩人，他連蕭定一都玩，嘲兒子影壇事業已八八九九，行人止步；蕭定一得老蕭真傳，句句頂心杉，笑老竇盛年風流，年老卻做電車男，又多口、冇朋友。大細蕭一脈相承把口唔收，你寸我我寸你，父子極樂原來係寸嘴寶鑑。 撰文：朱倬誼
蕭若元自詡醒過阿仔
蕭若元是肉蒲團的開山祖宗，他曾為90年代的《玉蒲團》擔任監製，今次他在3D版中做出品人，同樣賣個滿堂紅兼充滿話題性，這套電影也是其滿意作之一，因為太難拍，他說：「20年後再拍，票房收多一倍，奇蹟嚟嘅，票房係僅次《色，戒》，但嗰套係奧斯卡導演加康城影帝露啷啷，你畀個金城武露械，我即刻收億畀你睇。」
「我少返屋企」
老蕭這次是後排攻擊，前線有威畀阿仔蕭定一攞晒，老蕭卻說不是刻意經營：「以前拍電影我都係咁，唔上第一線，我好懶。」其實他眼中的蕭定一是否好醒？他大笑：「睇佢同邊個比，同我比爭好遠。」在旁的蕭定一即大叫搭嗲：「我聽過好多次啦，我同啲兄弟姊妹由細到大都係日日俾佢嘲笑。」老蕭則說：「我真係好鍾意嘲笑人，我連自己都嘲笑。」
老蕭又笑道：「蕭定一呢輩嘅人冇咁勤奮，冇咁慳儉，因為冇壓力，呢個仔唔錯嘅，係品味有啲奇怪，佢鍾意啲女仔瘦到見骨。佢鍾意嘅嘢會努力做，但佢心地太好，成日太軟弱，對夥計唔夠耐性。」
老蕭有兩段婚姻，共有四名兒女，蕭定一是長子，老蕭的教仔方式是給予自由度，問他會否認為自己是好老竇？他說：「如果好細心養育同教育，我就唔係，以前我好少理啲細路，我少返屋企，因為俾狐狸精搞住。」
阿仔成就到頂
父母總望兒女成才，老蕭不例外，但他又多口嘲諷兒子：「佢嘅成就都八八九九，行人止步，拍到套《3D肉蒲團》都差唔多可以收工。其實佢幾為家着想嘅，唔計較啲錢係你定我。我對佢冇乜期望，想佢攞奧斯卡金像獎、諾貝爾獎咩？佢最學到我啲小動靜，學埋我呢啲唔係咁好，有好多嘢我做就得佢做就唔得，佢做俾人打o架。」
數老竇風流史
蕭定一小時候愛掹蕭若元衫尾，聽老竇跟老拍檔麥當雄、麥當傑兄弟傾劇本，從小他對演藝製作就耳濡目染。過去10年蕭氏父子拍住上開戲、搞整容生意，兩個月前還一擲5,000萬購入灣仔的兩層製作室，一老一嫩由朝對到晚，感情深得不可分割，但其實在蕭定一11歲之前，他跟父親關係有點疏離，因為父母在他3歲那年離婚，由嫲嫲湊大他，老蕭就日日神龍見首不見尾，原因係媾女。
白韻琴怪嫻姐撈味重
蕭定一篤爆老竇風流史，他笑說：「11歲之前我兩個禮拜都見唔到佢一次，佢年輕時比較風流，好多女朋友，有白韻琴、葉德嫻（Deanie），佢好少返嚟瞓。佢同白韻琴時，我得7、8歲，當時覺得白韻琴講嘢怪怪哋；Deanie對細蚊仔好kind，可能細蚊仔唔鍾意女人食煙啦，覺得佢撈味好重，但佢講嘢幾好笑，幾錫我哋。」到蕭定一16歲時，父親再婚，新娘不是Deanie，但蕭定一和繼母的關係也不錯。
蕭若元對蕭定一影響最深的，除了是為他帶來豐富知識外，基本上蕭定一是百彈齋主，直指老竇樣樣爭少少：「佢係一個好口是心非嘅人，佢以前成日講讀唔讀大學有乜緊要，都係出嚟做嘢o架啦。我讀完中七後，港大收我，我冇讀，某程度上係受佢呢番話影響，其實佢個心想你讀，佢口講一套心諗一套，表面開通其實傳統。」
蕭定一續說：「呢10零年我喺蕭生身上見到好多缺點，啲缺點我係唔可以重蹈覆轍，佢咁叻、學識咁深，做好多唔同嘅嘢，樣樣都做得唔錯，但從來冇一樣做到No.1，我就學識呢個人唔專心，佢太聰明，太多心。佢爭啲爭啲，我睇到唔好學嘅嘢，佢令你好多反思，佢啲網民對佢奉若神明，照計佢應該好掂，但唔係喎，我又撈得咁辛苦，有原因囉。」
「佢麻麻鍾意李彩華」
老蕭第二個致命傷，蕭定一想也不想就說是人際關係差：「佢好多口，好易激嬲人、得罪人，因為自恃得好緊要，佢插死人先算，家你仲吹佢唔脹，老人家亂講嘢，你嬲佢呀？打佢呀？長者好着數。」蕭定一爆老竇又是個電車男：「以前佢對住本書，家就對住iPad，篤吓票房、睇吓微博，自己聽吓自己嘅節目喺度笑，冇朋友、冇社交生活，所以佢做乜嘢都事倍功半，佢都好努力去改，但改嘅程度唔夠囉，因為佢忍唔住又要鬧吓呢個鬧吓嗰個。」他承認自己有老蕭真傳，經常開口夾着脷，但近兩年學識死忍，好一點了。
蕭若元是才子，身為才二代的蕭定一卻稱沒壓力，「佢係佢，我係我，每件事我盡咗自己能力做就算。」他沒想過要另起爐灶，「既然佢係我財產，冇理由用到嘅時候唔用。我比較現實，舉例《3D肉蒲團》，我有呢隻牌打，佢係原本嘅監製，我點解唔打？有佢畫龍點睛，掛咗名，古仔執一執，宣傳角度幫手諗吓，但95%嘅工夫都係我做，同埋佢始終係我爸爸，唔可以話割就割。我好現實地睇，我做呢件事，用佢有冇着數呢，有着數嘅就用，冇着數嘅就擺埋一邊。」
講到媾女，蕭定一謂他未婚前，父親沒特別意見，也沒叫他識多幾個揀清楚，他還寸老竇：「佢喺愛情上好成功咩？好失敗呀，呢個都係我喺佢身上學到嘅嘢──千祈唔好好似佢咁。」聽聞老蕭不喜歡蕭定一舊愛李彩華，蕭定一說：「佢係麻麻哋鍾意李彩華，因為覺得佢好細個，當時我冇咁穩定，佢覺得你對住個咁需要照顧嘅女仔，第時壓力會好大，咁我buy嘅。」
口是心非最想抱孫
其實蕭若元對兒子有何寄望？蕭定一又笑：「又係嗰樣，口講冇，其實好大寄望，佢希望我喺呢一代之中做啲嘢出嚟，得到人認同。」
蕭定一都36歲，老蕭現在最想的應該是抱孫，蕭定一說：「又係口是心非囉，由我結婚到家佢冇講過一句，到噚日佢終於講，你家幾好，係爭個仔啫。原來因為我阿嫲早兩日入醫院，佢去探病，阿嫲就晦氣話我冇用呀，就嚟死啦，阿爸話你唔好呀，阿一畀個曾孫你抱，你點都等埋先。其實佢個心好想，又費事畀壓力我，但生仔慘過拍戲，天意嚟o架。」