塗鴉少女少男撐艾未未嘅塗鴉，好多時唔夠一日就被鏟走。未未未回家，最近社運中人就諗計再撐過。新民主同盟成員范國威（Gary）就同盟友各自喺自己嘅區議員橫額位上，印上塗鴉少女同網民設計嘅塗鴉，成功爭取艾未未頭像同訊息喺香港合法展示！
偷雞內地印製
咁都未夠威，Gary透露，由於橫額數量唔算多，今次成功偷雞喺內地印製！橫額店老闆擔心用慣常速遞，批貨會過唔到境，良心商人不惜親自運批貨落香港，好彩有驚無險。
不過Gary印艾未未Tee就冇咁好彩，佢話近日喺內地訂購「反對地產霸權」同「誰怕艾未未？」兩款Tee，但係間廠唔敢接艾未未嗰款，Gary惟有喺香港印。社民連吳文遠噚日去中聯辦示威，就率先着上社記新製嘅艾未未Tee，據知零售價一嚿水。
塗鴉停不了，有市民就去到九龍皇帝曾灶財展覽場內嘅公眾塗鴉區，噴上艾未未未回家字句同圖案，重案組要阻都阻唔到。