不老發哥　狂野時速2002

不老發哥　狂野時速2002

近年每次睇見發哥周潤發出現，就深明男人年紀越大，反而散發出另一種吸引力。男人魅力不在乎年齡，車亦然！好似呢部72年出廠的BMW2002tii，雖已踏入阿伯年齡，但瀟灑不羈的雙門小房襯上一身鮮橙Look，依然可以引死妹妹仔。莫講話外形可以鍊贏後生一輩的寶馬3系，130匹的後驅力量依然可以上演一幕狂野時速。

記者：許維雅
攝影：林栢鈞、黃子偉
Model：Rika@GME

3系Coupe老祖

■2002tii經已年紀不輕卻野性十足，鮮橙色車身為它加多一點輕狂。

想好似發哥咁越老越有型？咁又唔係個個男人都可以，總要有啲大明星風采打底先得。曾經於七十年代紅極一時的BMW2002，八年間的總生產量超過36萬架，何況它所背負着寶馬歷史的重要里程，令呢粒寶馬之星有晒先決條件繼續越老越有魅力。起初只知道2002車系屬現代寶馬3系的始祖，再翻看歷史記載，先知道原來它有份拯救當年瀕臨破產寶馬。大膽提議將一副2000車系大房車所用的2公升直四引擎，塞落去一部雙門小房車之上，MaxHoffman可說是2002之父，當年呢部力量強勁的SportSedan更為今時今日的3系Coupe奠下深厚的基礎。
論動感外形，2002當然鬥不過新一代的流線型3系，不過四四方方的造型加上寶馬經典的豬鼻鬼面罩，脫俗有格，加上出奇地感覺應該只屬於寶馬的鮮橙色車身，配上由頭到尾的大量電鍍粉飾，泵把、燈罩、側鏡及腰線都閃閃生輝，搶眼指數一定更勝新3系。

■豬鼻鬼面罩標記多年不變成為經典Icon。

■指揮燈唔係貼住頭燈，置於車角的設計很罕見。

■方形車尾線條及尾燈組合設計工整，懷舊味十足。

■輪圈細細似放落MINI度用，略嫌花紋唔夠獨特。

唔怕水滾劈住入彎

於1968年正式面世的2002車系，及後衍生了開篷、Turbo、ti及tii版本，市場上買少見少，今次主角係72年出廠由英國抵港的2002tii。加入了Kugelfischer機械式燃油噴注系統的tii版本，大大提高了2002的小跑性能。千祈唔好以為呢部老人家好好蝦，以130匹馬力、176Nm扭力驅動1,010公斤的車重，最高時速可以達190km/h，配合靈活爽快的四前速手波，0-100km/h只需要9.8秒，加上後輪驅動和長闊高只有4,216×1,626×1,410mm的輕巧車身，唔怕老人家水滾的話，谷盡劈入彎真係可以下下甩住尾入，嚇得諗住坐老爺車輕鬆遊車河的靚女Rika都花容失色。

■電鍍泵把跟橙色車身配襯之下，更顯型格。

■全黑內櫳以三幅式軚環最搶眼。

■中控台呢個黑色鐘仔係tii版獨有。

車廂有點點跑味

全黑色的內櫳佈局不算得豪華，設計沒有太大特色，惟獨三圈點綴的三幅式軚環最搶眼，為車廂帶來一點點跑味。已飽歷39年風霜的2002tii，內櫳仍然十分整潔企理，後座雖然設備簡陋，但勝在車窗都可以半開透風，夠晒細心體貼。十幾萬元車價就可以擁有一部有樣有得劈的經典，難怪一有2002出現就好快被寶馬迷掃走。

■加入燃油噴注系統的tii引擎。

■古董車必有的雞翼窗百玩不厭。

■四四方方尾箱實用度極高，放得落行李篋。

72年BMW2002tii

引擎：1,990cc直四
馬力：130hp/5,800rpm
扭力：176Nm/4,500rpm
傳動：四前速手波後驅
售價：約$128,000
查詢：23641666（MiniPit）