上星期日在皇朝會飲茶，食到飽一飽，下午兩點幾埋單後，本想行街散步，幫助消化，點知收到建築邦電話，話是日天朗氣清，去一處地方飲下午茶最正。咁快就飲下午茶，點食呀？建築邦話：「當飲杯咖啡、EarlGrey啦，唔食嘢都得嘅啫。」究竟去邊度，原來建築邦係香港遊艇會會員，就在隧道旁邊。於是一行人唔客氣咯，駕車前往，入到去之後，建築邦帶我哋行到最近海旁之處，有大樹遮蔭，坐在木櫈上可以近距離望維多利亞港，耳聽海浪拍岸之聲，如此風景，香港幾曾得見，瞌埋雙眼，好容易會入夢鄉，既然復活節留港，入到嚟遊艇會，當作到咗泰國渡假亦可。
香港遊艇會嘅英文名稱仍沿用RoyalHongKongYachtClub，夠古典噃，RoyalHongKongJockeyClub已經取消Royal呢個字啦，但遊艇會會員經過幾次投票，仍然反對取消Royal，只係中文名稱方面唔用「英皇御准」啫，聽講去到歐洲，有Royal一字，身價零舍不同，故此會員唔肯刪除。呢個會有長遠歷史，行上三樓宴會大廳嘅樓梯，可以見到十張八張古舊相片，一九四八年之時，會所所在地係一個小島，一九五○年代開始填海，百德新街仍未成形，海水直入今天之維多利亞公園。睇吓古老照片，坐在室外長椅上，有懷舊之情，入到呢個會所，人都會放鬆晒嘅，覺得日日趕喉趕命，究竟為何，不如在此會所海邊曬太陽，飲杯茶，這麼着就下午了，「鴿子在市政廳後面築巢，河水流它的，這麼着就下午了。」左丁山極少極少如此懶洋洋地飲下午茶，忽然間想起瘂弦呢首詩。
可是俗務逼人，還未等到「太陽像一朵大紅花」，眾人已經話要走嘞走嘞？走去邊，返屋企開枱囉，大戰八圈，左丁山嘅荷包輕咗二十底，夠買好多本瘂弦詩集，早知不如讀書好過。賜官送嚟兩本新書，由次文化堂出版，一本係「奇謀啟示錄」（原名「三國勝經」），寫三國演義入面之種種奇謀奸計，例如司馬懿諫曹丕謙讓；另外一本係「神棍通識」，拆穿各種神棍騙財騙色之術。賜官識得最多通識，周身計，讀佢嘅書可助傍身！