拳擊一向係男人嘅浪漫，兩個男人赤條條，拳來拳往、睇到人熱血沸騰！要打到出汁可以睇《洛奇》，想睇靚仔有《博擊會》，想睇陽剛味濃兄弟情？《擊情手足》啱啱出咗碟，勞動節最啱睇佢兩兄弟點樣喺擂台上勞動，唔只打到拳拳到肉，拳風仲聽到入耳。
記者：王震遠
大佬羞家 細佬頂上
《擊情手足》喺香港上過畫，雖然風頭一般，但戲力強勁！勁到喺奧斯卡橫掃最佳男女配角兩個獎項。古仔真人真事改編，艾迪奇同華米奇兩個鍾情打拳兄弟，贏到開巷嘅艾轉行鍾情吸毒，搞到要喺最光輝時刻，退出拳壇轉做教頭。大佬無得玩，阿媽惟有將成副心機推晒落細佬度，點知佢咁啱又阻滯多多又自卑。女友仲勸佢同家人反面，飛甩阿哥靠自己上位。點知華仍對大佬念念不忘，最後決定孖番大佬做拳王。
聽唞氣聲 唞唔到氣
作為一套拳擊大作，觀眾當然想由頭打到尾，如果係咁諗就可能有點失望！《擊》有一半係文戲，交代兩兄弟嘅感情；真正埋牙開波有三段，全部係必煲場口。導演可能想表現出肉緊嘅張力，喺聲效方面落重藥，尤其尾段挑戰輕中量級世界錦標賽，進場一刻觀眾嘅歡呼聲聽得出層次感，感覺到好似圍住自己一樣。
擂台上！拳拳到肉嘅聲音特別清脆，好似打到埋身咁款，近鏡時更好似聽到微弱霍霍拳風，倒地聲直情有漸變效果，由強到弱嘅聲音轉向夠明顯，無論畫面到音效都令人唞唔到氣。
背光位無失真
擂台上唔止得把聲，煲畫面亦有唔少CheckPoint位。頭頂一支大光燈硬射兩個裸男，光同影配合起嚟都有對比層次，背光位仍然睇得到主角個樣嘅Detail，完全無失真，值得一煲！另外，拳擊比賽亦係欣賞皮膚一大好位，事關兩個男人已經赤裸上身，汗粒線條明顯可見，皮膚紋理一樣睇到，白人面口最怕偏紅，今次《擊》做得色澤均勻，皮膚夠晒白滑，反光位做得靚，仲有暗位亦做得乾乾淨淨，無多餘雜訊令人以為主角皮膚粗糙！
《擊情手足》
語言：中、英語
音效：DTS-HDMA7.1、DD6.1
視像比例：1.78:1
售價：BD$199 DVD$95
查詢：DVDPro（23326326）
