商場攻略:寵物攝影+裁縫月賺4萬

商場攻略:寵物攝影+裁縫月賺4萬

從事平面設計的黃韻欣(Wendy)自小養寵物,8年前開始寵物攝影及度身訂做寵物衣服,單靠網頁,即使沒有街舖,仍能吸引寵物主人光顧,旺季每月賺約4萬元。
記者:陳皓怡 攝影:程志遠

「嗰陣時市面上好少人幫寵物影相,全港唔多過5間,好多人都係兼職做。」Water出世個多月已成為Wendy的模特兒,由於「工多藝熟」,Wendy其後更幫狗會朋友拍「團體相」,在口碑相傳下,找Wendy拍照的顧客越來越多。
「之前正職做設計師,都會在外面接工作,因為只可以星期六、日做,如果室外攝影,一日只可能做到兩單,若三、四單都係同一日,就要調到第二日。」見到眼前商機,Wendy逐由兼職轉為全職,客人一般消費由1000至2000元,旺季每月可賺3.8萬元(見表)。

影婚紗相遭惡八哥噬

Wendy說,接第一單生意時情況頗為狼狽,「嗰次太多狗,幾難控制住牠們唔好周圍郁,又怕佢哋周圍去廁所。」至於最難忘經歷,莫過於被狗襲擊,「客人想同隻狗一齊影婚紗相,我唔知隻狗有冇攻擊性,本身隻八哥都係自己周圍走,當我輕輕幫個客撥一撥頭髮,隻狗以為我攻擊佢主人,所以就噬埋嚟。」
除了為寵物拍照,Wendy亦會為愛犬扮靚,但市面上大部份都是小型狗隻的衣飾,大型狗隻的衣飾選擇有限,「當時想買件雨褸畀佢,上寵物店買唔到佢嘅size,咁啱有朋友幫人做禮服,我就問可唔可以幫我隻狗做。」

度身訂做戰衣拓客源

效果理想,除了令Water增添不同款式的「戰衣」,其他狗主朋友亦爭相查詢。引發Wendy將生意擴展至訂做寵物衣飾,「可能市場覺得細狗先會怕凍,所以只有畀細狗着嘅衫,大狗嘅衫就好少,度身訂做就更加少。」現時不只大狗,小至芝娃娃都有客人要求度身訂做。
寵物攝影客源由草根到中上層,不過度身訂做寵物衣服則主要是中產客,因為每件寵物衫約400元,「有個客人屋企可能有幾隻狗,間中會一訂5、6件,都係同一款,有時唔同款,講低個尺寸做起就叫個工人嚟拎。」現時有很多主人結婚時希望為寵物訂做禮服、婚紗,與牠們合照,佔現時寵物衣服的生意額八成。

聖誕節、新年等是寵物衣飾的旺季。

上門度身增競爭力

寵物生意夏天一般是淡季,每月營業額約2萬元,「呢啲唔係必需品,試過金融海後嗰個夏天,消費力好差,夾埋攝影同寵物衫,一個月先做到5單生意。」開業初期,為擴闊客源,Wendy試過不同推廣方法,「試過畀幾千蚊喺網上搜尋器落廣告,但成效唔大,況且自己網頁累積一定點擊率會排得前啲,佢哋都搵到我。」
生意靠口碑,可以透過網頁吸納新客,她亦不時在狗展設攤位。開業8年,市場上寵物攝影越來越多,競爭越來越大,為增強競爭力,故提供上門度身服務,「客人帶隻狗出嚟度,其實係一件幾麻煩嘅事。」為寵物度身後,就到處搜集布料,縫製一件件寵物「戰衣」。