「事頭婆娶孫新抱，梗係大件事。」事頭婆這稱謂可謂港人集體回憶，一對香港老夫婦（圖）遠赴倫敦，親睹威廉王子大婚，「當年英女皇訪港係頭條新聞，但喺電視睇咋，家可以親自睇到喎！」
《蘋果》記者：馬泉崇、翁煜雄倫敦直擊
不少香港人專程前赴倫敦觀看威廉大婚，曾氏夫婦是其中一對，他倆與記者談起英國皇室仍滔滔不絕，「當年喺電視睇英女皇訪港，家佢個孫都結婚，真係好似睇住佢哋一代代長大咁」。伊利沙伯二世與皇夫菲臘親王1975年5月訪港，是英國君主首次訪問香港，他憶述當年是社會大事，「電視全日播住，報紙係頭條新聞」。
「我哋叫佢做事頭婆。」退休公務員曾太說，之前所有政府大廈都會掛上英女皇相片，「政府管我哋，英國管政府，咁咪叫佢事頭婆囉。」
為戴妃婚姻破滅可惜
其實，這對結婚43年的夫婦也很「威水」，兩人乘坐頭等機位到英倫，再入住超貴的倫敦朗廷酒店豪華套房三晚，更可品嚐酒店專為威廉大婚首創的AfternoonTeaRoyal，總值逾22萬港元，但最威水的是他們不用花分毫，因為曾太贏了英航香港航線75年周年徵文比賽冠軍，「我寫咗五十字咋，話我哋都75歲，好想喺仲有體力時把臂同遊英國囉」。
兩人結婚43年從未吵架，一直小心經營這段婚姻，故曾先生對皇室婚姻尤其關注，「當年戴妃嫁畀查理斯，好靚，吸引全球包括香港人」。他坦言一直十分關注這段童話婚姻，外界總以為童話會美滿下去，「但佢哋衝突越來越多，唉，有時做嘢都唔顧下一代感受。」看着童話幻滅，曾先生猶如看到子姪離異般，更為了美麗的戴妃車毀人亡感到可惜。
當年喪母神傷的小男孩成家立室了，「希望佢哋可以令大家對皇室婚姻有番信心啦。」曾伯伯說，一般人對王子公主的童話或已隨戴妃逝去而不再心存幻想，「但呢次一對新人都成熟啦」，尤其凱蒂較具自主性，懂得如何在皇室壓力下自處，「希望佢哋可以白頭到老，等一般人對童話有番啲幻想」。
寄語新人要互讓互諒
兩夫婦抬頭望着攝政街掛滿賀皇室大婚的英國旗，「威廉王子同王妃會經過邊段路呀？如果唔逼人，過到去睇就好」。之後兩人為將目睹事頭婆居住的白金漢宮而十分興奮，臨別前又寄語一對新人：「送佢哋八個字，互讓互諒，從一而終。」
