一個「棒棒堂」髮型時髦到被譽為是桌球壇JustinBieber，一個厚厚蛋糕頭十年如一日，21歲的鄧立普同24歲丁俊暉，合力在周四展開的世界桌球錦標賽，上演「型男對戇男」4強大戰；賽前舌戰，自稱是球壇「花花公子」、又狂言「無人能勝」嘅鄧立普先拔頭籌，暫以5:3領先。
就連周三晚以13:10擊敗沙奧比，第一次晉身世錦賽4強後嘅小丁也說：「鄧立普是一個好nice嘅球手，而且好多女朋友。我知道佢好難打，我又第一次打33局咁長的比賽，但相信有千千萬萬個中國球迷幫我打氣。」
小丁嘅戀情亦一如佢嘅蛋糕頭一樣悶蛋，咁多年傳來傳去都係同9球天后潘曉婷嘅「姐弟戀」，同住嘅丁媽仲喺世錦賽前踢爆二人只是「好朋友」，話嗰仔社交圈子細，識女仔的機會唔多喎！
「現在冇人能贏我」
咁同樣喺桌球圈大、同小丁一樣都是窮等人出身嘅天才新星鄧立普，點解可以精采咁多呢？佢都係英國新希望，仲有人視佢為「火箭」奧蘇利雲嘅接班人；佢喺世錦賽前唔怕破壞形象，夠膽同英國《太陽報》Page3女郎合照，順便話自己喺中國公開賽期間同女友分咗手，自己喺「空窗」期，歡迎有興趣女士埋身，似是英國老化嘅桌球壇一股清新劑。
鄧立普說話大膽，晉身4強後講明：「我不是自大，是自信，我感覺現在冇人能贏我，那感覺很好呢！」有人說若他再紅一點的話，佢嘅「棒棒堂」髮型會如17歲加拿大樂壇小天王JustinBieber嘅留海頭一樣受fans追捧。事實上，佢現在每天比賽期間還潮玩Twitter，「關注」佢嘅fans快突破2萬大關。
今午香港時間5時，二人將上演4強第2節比賽（now637台今日5:00pm直播），睇吓「中英大戰」喺今日英國皇室大婚日，能否為桌球搶一點客。
下線70後對碰
世錦賽4強，上線是80後之戰，下線則同係70後嘅前世界冠軍威廉斯（左）對希堅斯（右）之戰，希堅斯在8強同「火箭」奧蘇利雲力戰23局下，以13:10戰勝對方晉級，曾領先對手8:5嘅「火箭」賽後自嘲是「業餘」水平。威、希二人在去年12月英國錦標賽決賽曾碰頭，當時希堅斯勝出。順便一提，在今屆世錦賽一個球迷關心嘅話題，就是有關7屆世界冠軍亨特利是否退役，他周四同英國BBC表示下屆會「留下」，並會參加所有世界排名有關的比賽。
