名人明星賀王子大婚

名人明星賀王子大婚

英國威廉王子大婚,全球關注,香港人對英國情意結依然深厚,本地名人明星都關心王子婚事,JoyceMa胞妹郭志怡昨日就特別揀王子大婚日開張餅店,名嘴陶傑就以「吳彥祖搭鄭秀文」,形容靚仔王子娶平凡王妃。

香港曾受英國殖民統治百年,對英國特別有感情,威廉王子大婚,本地時裝女王JoyceMa胞妹、本地名店SEVVA創辦人郭志怡,就特別揀昨日王子大婚日,舉行餅店MSB'sCakery開幕禮,更將平日店內的公主餅,創作王子餅配合,她說:「做咗英國殖民咁多年,皇室大婚真係額外有親切感,家仲有邊個國家有咁靚嘅地方、咁靚嘅馬車,去成就呢件咁靚嘅事。」提到王子,她說:「希望佢唔好再瘦,唔係塊面就仲長,禿頭可能壓力大。」

郭志怡刻意挑選王子大婚的吉日,為新店主持開幕禮。

陶傑形容威廉王子和凱蒂的組合,是「吳彥祖配鄭秀文」。

李桂蘭晚宴慶祝

李麗娟胞妹李桂蘭的丈夫PeterDavies是英國人,兒子Sean當年也和王子一樣讀伊頓公學,他們和一班在港的英國富人,昨晚在中環香港會所搞晚宴慶祝兼看王子結婚直播,李桂蘭說:「Kate冇戴妃嘅氣質,不過都幾靚,好啱做王妃,估計將來都會做王后。」
陶傑昨日在灣仔出席琥珀飾品宣傳活動時爆鄧永鏘收到囍帖,提到有指威廉王子的婚姻不被看好,陶傑說:「有人憎人富貴厭人貧,任何靚女我都唔睇好,終有一日會老,做人何必咁負面。」相比當年戴安娜的世紀婚禮,陶傑說:「當時新娘子靚,新郎哥猥瑣,今次新郎靚,新娘平凡,當年後面有戴卓爾夫人,今次弱咗少少,打個例子家係吳彥祖搭鄭秀文,三十年前就係葉楓搭張英才。」

AnaR.想嫁王子

王子大婚,無數少女夢碎,AnaR.前晚在西九出席樓盤活動,和德國公主IravonFurstenberg同場,AnaR.揚言要叫公主介紹王子給她,她說:「如果我年輕一點,我也想嫁給威廉王子,他們是一個好完美的童話故事。」蒙嘉慧在電話中說:「呢個係國家盛事,睇到都覺得好開心,會祝福佢哋,不過我一向都覺得婚禮唔代表婚姻,唔一定要童話式嘅。」鍾嘉欣則說:「唔係羨慕嘅,但戥佢哋開心,始終係王子婚禮,感覺好靚,好想參與、好想去到現場睇。」
採訪、攝影:卓寶花、盧妹、顏英儀、戴彩煥