陳茵媺、胡杏兒、劉璇前晚去到銅鑼灣出席《雷神奇俠》嘅首映禮，着住白色恤衫嘅胡杏兒透視咗裏面嘅黑色胸圍，講真認真娘爆，不過佢話自己一身性感打扮只係碎料喎，但就無意襯夏天嚟個性感大解放。
爆陳豪約食飯
近期緋聞纏身嘅陳茵媺早前被指佢介入陳豪同廖碧兒之間嘅第三者，陳豪日前接受訪問時就話要同佢道歉，陳茵媺話：「佢有call我道歉，話想同我saysorry拖咗我落水，我話朋友間唔使講呢啲，佢都解釋咗。至於第三者稱號唔再回應，都過咗去，大家知唔關我事就得。」
不過提到陳豪喺節目入面大讚佢，陳茵媺即禁不住甜笑話有人讚好開心，不過提到會唔會加快兩人嘅發展時，佢就大賣關子話：「吓？加速？順其自然，我鍾意舒舒服服多啲，佢冇講過話追我。」但係佢就漏口風話陳豪曾約佢食飯道歉，馮仁昭再追問如果陳豪真係展開追求攻勢嘅話，佢會唔會接受時，佢就尷尬話：「唔識答呢個問題，我需要順其自然同舒服，你哋個個都話佢好，咁佢都OK，但需要多啲時間睇清楚呢位朋友先，我對感情事好認真，唔係拍散拖嘅人。」
否認陷三角戀
此外，陳茵媺噚日穿上露背連身裙到尖沙嘴出席百家布籌款活動，提到佢餵蕭正楠食嘢，搞到佢哋嘅關係七國咁亂，陳茵媺就話佢冇睇過報道，不過佢就好離奇話無論拍戲定現實生活，佢都唔係好記得有試過餵對方食嘢喎！記者取笑佢情陷三角戀時，佢即刻話：「No,No,No，唔好嚇我，蕭正楠係好好工作伙伴，不過冇呢回事囉。」
