在日本專門發明古靈精怪玩具及樂器的明和電機，前晚其社長土佐信道帶領他的電機樂團來港，舉行「明和電機VoiceMechanics音樂會」，吸引大批崇拜者朝聖。明和電機除帶來大堆騎呢樂器外，更特地學唱兩首廣東歌《紅日》及《愛情陷阱》，但因廣東話唔鹹唔淡，亂唱一通，令全場觀眾笑到碌地！
早於1961年成立的明和電機，前晚於九展舉行音樂會，社長土佐信道帶同大批古怪架生來港，包括花花型開合式敲擊樂器Marimca和自動結他Mecha-folk，還有今次來港主力推介的發聲蝌蚪Otamatone等。
社長連同幾名成員以招牌藍色工衣登場，他身上背着響板木魚現身，木魚裝在機械翼上，土佐社長指自己恍如超合金人，機械翼會自動升起，更用廣東話介紹自己說：「大家好，我係明和電機，多謝！」又用英文介紹台上多種架生，之後向台下觀眾表示要唱著名廣東歌，便立即唱出李克勤的《紅日》，雖然觀眾都聽不懂他在唱廣東話，但已high爆。
出動貓紙照甩嘴
近尾聲時土佐又再發功，叫全場觀眾站起一齊唱《愛情陷阱》，他雖拿貓紙邊看邊唱，但發音比《紅日》更亂嚟，幾乎全部都是脷帶過，但觀眾一點都不介意，笑到翻天，又跟他一起唱，氣氛熱爆。
除了廣東歌外，土佐又用騎呢樂器演奏名曲《MyWay》及唱出明和電機公司主題曲等，而明和電機生產的發聲蝌蚪Otamatone是今次主角之一，土佐更請官恩娜上台玩發聲蝌蚪，二人演奏兒歌《有隻雀仔跌落水》十分搞笑，同樣令觀眾笑爆嘴。
採訪：阮瑜 攝影：仇志德
