以前爛賭到癲嘅史篤城中場艾法寧頓，經已成功戒賭，仲幫球隊打入今季嘅英足盃決賽，點知前晚喺贏狼隊3:0場英超中拉傷大腿，極有可能無緣去溫布萊比賽。唔通個天真係唔肯畀次機會佢？
還清債務踢出成績
現年29歲嘅艾法寧頓條命真係幾苦，呢個左腳進攻球員喺英甲彼德堡出身，00年俾熱刺睇中，點知喺白鹿徑坐多過踢，最終喺03年轉投韋斯咸。去到韋斯咸，佢終於發光發亮，仲喺04/05球季，於卡迪夫千禧球場進行嘅英冠升班附加賽決賽，交個靚助攻畀森莫亞奠勝，令球隊得以以1:0打敗普雷斯頓，躋身英超。點知喺效力韋斯咸其間，佢被揭發原來超級爛賭，狗馬啤樣樣啱，結果搞到欠落大筆賭債。雖然韋斯咸借過錢畀佢還債，不過當時領隊蘇拿最終都係唔要佢，於是喺09年1月將佢賣到史篤城。
艾法寧頓嚟到史篤城後亦決心戒賭，同埋用行動嚟報答球會，結果佢亦好爭氣，上季仲當選球隊嘅最佳球員。佢先排話：「我對上嗰次落注，係喺09年9月27號。自從我戒賭之後，覺得真係好好，做乜都好順利。」今季佢亦繼續有好表現，其中喺對保頓場英足盃4強戰，仲先開紀錄，協助球隊大勝5:0入決賽，下月14號喺溫布萊同曼城爭冠軍，諗住大顯身手。
「你去唔到溫布萊！」
但好衰唔衰，喺前晚贏狼隊3:0場英超，艾法寧頓踢咗31分鐘就因拉傷大腿而被抬離場，而且仲俾狼隊球迷揶揄：「你去唔到溫布萊嘞！」史篤城領隊佩利斯就話：「我哋真係好失望。我哋得番18日時間備戰，如果艾法寧頓可以喺一星期之內好番，仲有10日時間操弗，家佢要同時間競賽。」我求大俠都為艾法寧頓送上祝福，希望佢可以好快好番啦！另外，狼隊輸波後繼續尾2，家陣英超尾5隊之間得3分距離，睇怕隨時去到最後一輪，先知邊3隊要降班。