商用車真係進化得好勁，集私家車賣相、七人車寬敞、四驅車靈活於一身，加埋Turbo及自動波，簡直係Crossover的最高境界，仲要23萬車價、$12.04/L柴油價，你會同我一樣激動：「N年前考落嘅1、2號牌終有用武之地！」
記者：徐影龍
攝影：陳陶鈞
Model：Rika@GME
沙上發力走得甩
最令人驚喜部份係操控，Turbo車配自動波，可以「一手一腳」Hea住遊車河。最正係首度加入四驅系統，起步更爽、入彎更咬地，就算面對Off-Road都應付到。我哋就膽粗粗將半架車駛落沙灘，離開時上斜兼尾轆「入沙」，起初有點泥牛入海難發力，但一腳踩多啖油，Stavic拾級而上，成功搶灘！
絕無MKVan味
韓國廠牌雙龍Ssangyong，喺香港主力催谷旗下Pick-up車款，商用車其實唔多，今次呢架Stavic又真係爭回不少面子。雖登記類型為客貨車，但圓渾車頭似足私家車，頭冚骨線清晰有力，頭燈及鬼面罩大得誇張，仲有埋實用又型仔嘅霧燈，已經唔係Van仔咁單調，車身猶如七人車般巨大，車櫳相應闊落，前面坐五個人好鬆動，後面仲有大把位擺貨，加上如SUV般嘅頂架，以及設計獨特嘅方形車尾，完全當私家車揸出街！情形就如演藝界同IT界，AKB48同SONY係好勁，但少女時代同三星一樣搶走唔少宅男Fans，尤其係日系車大缺貨嘅今天，韓仔分分鐘可以乘機搶下一大嚿餅呀！
唯一要彈係尾排同尾廂之間嘅鐵網間隔，令Stavic「私」得唔夠徹底，不過佢都唔想，多得香港政府夠腦殘，立下諸多法例限制，誓要釘死柴油車。
內櫳尾廂無敵闊
Stavic唔只外形似七人車，就算揸同坐都咁好Feel。首先內櫳真係夠闊落，肥仔攝影師坐前排，長腿索模坐後面，大家一樣鬆動舒服。駕駛艙設計亦值一讚，由錶板到中控台，全都斯文大方望落順眼。
以質論價，若你有2號Van仔牌，Stavic抵買度頗高，柴油亦比電油慳成4，返工代步條數好襟計。最煞食係23萬車價，日系車只夠買架好少少嘅四門Sedan咋，想買MPV？起碼加多十萬啦！
Stavic2.7
引擎：2,696cc直五Turbo
馬力：165ps
扭力：34.7kgm
傳動：5速+/-波箱四驅
售價：$230,000
查詢：21172287（SsangyongMotor）
