雖然手指公好痛！但我無論搭車、食飯、等女朋友，都會把握時間打機；就算家人話我毒、唔合群，我都堅持維護艾露貓呢隻好Partner。係！我晚晚聽住《獵人之歌》打芒亨就係等呢日，我要拎999.9千足純金黃金獵人證書、我要得到遊戲製作人親筆簽名嘅「狩人猝業證書」！磨刀千日用在一朝！
文：阿洛
必排熱選
免費拎超限量金牌
日本遊戲界最盛大嘅MonsterHunterFesta，今年首度移師香港舉行！上面講嗰呢兩張Cert，我大膽講句志在必得！把刀雖則用在一朝，但好難估呢朝究竟要幾早起身！
「MonsterHunterPortable3rd黃金獵人祭」將於本周六起一連三日舉行，首10名購買指定日本限定精品套裝獵人，可獲999.9千足純金「黃金獵人證書」（全球限定10張），唔去排隊，咪即係有金都唔識執？人神共憤呀！
萬一起唔到身，可參加「狩人卒業試」，只要每日下午1-3時，喺現場完成「潛口龍」考試任務，就可以獲得製作人辻本良三先生親筆簽名「狩人卒業證書」，成為官方認可獵人！不過每日限量70張，都係校多個鬧鐘啦！除以上兩壇必排項目，喺會場內指定地方完成不同任務，集齊怪物圖騰蓋印，只要集齊四個，就可得到珍藏禮品，又係嗰句，限量囉！
與製作人神交
遲起床嘅獵人留意嘞，終於有嘢唔限量！只要你自攜PSP到大會指定集會浴場，就可以吓辻本良三先生隻艾露貓同獲取「公會卡片」，同「芒神」虛擬交流！
高手係寂寞嘅，所以我都唔介意星期六去現場睇吓人哋比賽，當日仲會舉行「MonsterHunterPortable3rd絕對強者賽」決賽，無嘢嘅，怕醜無參加嘅我，緊張就稱唔上，咪喺旁邊笑吓你哋咁囉！
MonsterHunterPortable3rd黃金獵人祭
日期：4月30日至5月2日
時間：中午12時至晚上9時
地點：海港城海運大廈二階SportX多功能運動場