香港左派元老吳康民本月23日獲總理溫家寶單獨接見，前日吳康民透過佢擔任主席嘅培僑教育機構發出新聞稿及相片，消息出街後政界議論紛紛，全方位試圖解讀呢次會面有乜隱密訊息、微言大義。喺海嘯式口水評論浪潮當中，八方收到可靠消息，「上面」要將呢次會面急降溫，漏夜指示香港愛國傳媒必須「冷處理」呢單新聞，令呢次會面內情更耐人尋味。
左報抽一半稿件
吳康民喺本地左派陣營地位崇高，《文匯報》、《大公報》及《香港商報》等愛國報章，大做「溫吳會」新聞理所當然，不過三份報紙噚日報道卻簡而清，與電子傳媒及其他報紙比較，篇幅更顯得不夠顯著。知情人士同八方講，前晚「上面」突然下達指示，話不要大做，因此幾份愛國報章即時刪減篇幅，據講抽咗最少一半份量稿件。
除咗減少篇幅，報道內容亦刻意平淡，《香港商報》定性為「閒話家國事」；《文匯報》引述吳康民稱，溫家寶「並非要透過他向香港市民表達任何訊息」；《大公報》指「溫吳會」係「朋友敍舊」，更欲蓋彌彰，指溫家寶去年都見過國學大師饒宗頤。
為免外界揣測「溫吳會」內幕一發不可收拾，八方聽聞好多左派人士都收到提示，唔好再「炒」呢件事，要淡然處理，因此佢哋噚日異口同聲為會面降溫，人人大事化小，小事化無，幾乎講到好似只係兩個閒人偶然見面咁平常，十分古怪。
吳康民都要轉軚
其實吳康民都「聞」到味，前日下午佢向記者表示，溫總認為香港有社會矛盾未解決，又話內地有人唔肯講真話，只講大話、套話，但晚上再受訪時，卻唔再提呢啲嘢，只係話同溫家寶閒話家常。點解吳康民都要轉軚呢？唔通上面有人認為溫總講話敏感，因此禁止出街？
亦有一個無從證實說法，前日係《4.26社論》發佈22周年，眾所周知溫家寶當年係趙紫陽秘書，佢指內地無人講真話，其實係曲線批評《4.26社論》。呢次「溫吳會」真相恐怕難見天日，至於下令冷處理會面係權鬥現象，抑或只係溫影帝自導自演，好戲在後頭！
mailto:[email protected]