英冠「1哥」昆士柏流浪（QPR）都算唔好彩，前晚佢哋喺聯賽俾來訪嘅侯城逼和1:1，若然諾域治主場對打比郡失分，佢哋就可以直升英超，點知諾域治嘅施蒙積遜喺完場前完成帽子戲法助球隊贏3:2，家QPR44戰得85分，諾域治同卡迪夫就分別得80分同79分，數字上未肯定可以直升。
不過，佢哋喺得失球差領先卡仔13球，除非最後兩輪有異常賽果，否則直升應冇問題。另外，菲爾布朗（圖）上季教黑池時，季尾俾人燉冬菇，所以黑池由英超降落英冠，唔關佢事；但今季季中佢上任成普雷斯頓領隊，球隊前晚輸畀卡仔0:1後落實降班，我求大俠即時諗起一句說話，就係「係你嘅，始終係你嘅！」